Կյանքումս առաջին անգամ զգացի, որ թիկունքիս կանգնած է պետությունը՝ առանց որևէ նախապայմանի և առանց վարանելու. Սևան Նիշանյան
Հունաստանի Սիրոս կղզու վարչական դատարանի որոշմամբ ազատ արձակված պոլսահայ մտավորական, Հայաստանի քաղաքացի Սևան Նիշանյանը Ֆեյսբուքի էջում կատարված գրառմամբ շնորհակալություն է հայտնել Հունաստանում ՀՀ դեսպանությանը և դեսպան Տիգրան Մկրտչյանին՝ իրեն ազատ արձակելու հարցում անհավանական ջանքեր գործադրելու համար:
«Հայաստանի դեսպանատունը և հատկապես դեսպան Տիգրան Մկրտչյանն անհավանական ջանքեր գործադրեցին ինձ ազատելու համար, նա աշխատում էր գիշերուզօր:
Դատարանը որոշեց իմ կալանքը կարճել։ Իրավիճակը դեռ վերջնական հստակեցված չէ, բայց կարծում եմ՝ վաղ թե ուշ պարզ կլինի: Հավանաբար մի որոշ ժամանակով կլքեմ երկիրը և, հնարավոր է, ապրեմ Հայաստանում կամ գուցե այլ վայրում։
Լավ կլիներ, որ հաջողեր ու բացեինք դեպի Թուրքիա դուռը։ Բայց, ցավոք, սա մեր հիմնական խնդիրը չէ»,- գրել է Նիշանյանը:
Ավելի վաղ հայտնել էինք՝ Հունաստանի կառավարությունը չէր երկարաձգել Սևան Նիշանյանի՝ Հունաստանի քաղաքացու հետ ամուսնացած լինելու հիմքով ձեռք բերած կացության իրավունքը: Նիշանյանի կինը՝ Հերա Ցուրուն, հայտնել էր՝ ամուսնուն դեկտեմբերի 30-ին ձերբակալել են կացության կարգավիճակի ժամկետը լրանալու պատճառով:
Հունաստանում ՀՀ դեսպանությունն ավելի վաղ հայտնել էր՝ տեղյակ է Սևան Նիշանյանի շուրջ ծավալված գործընթացից և ձեռնարկում է բոլոր հնարավոր քայլերը խնդիրը կարգավորելու նպատակով։
