ՀՅԴ Հայաստանի Գերագույն մարմինը շնորհավորական ուղերձ է տարածել Անկախության 29-րդ տարեդարձի առթիվ:
Ուղերձում մասնավորապես նշված է.
Սիրելի՛ հայրենակիցներ,
1990 թ. օգոստոսի 23-ին ՀՀ Գերագույն խորհուրդն ընդունեց Հայաստանի անկախության հռչակագիրը: Իսկ 1991 թ. սեպտեմբերի 21-ին հայ ժողովուրդը հանրաքվեով վերահաստատեց անկախ պետականություն կառուցելու հավաքական կամքը՝ հայտարարելով ազատ և անկախ Հայաստանի Հանրապետության նոր երթի սկիզբը:
Մեր անկախության քսանիններորդ տարեդարձն ենք նշում, սակայն անկախության երազանքով ապրել և անկախ պետականության գաղափարն ու տեսլականը կոփել են տասնյակ սերունդներ: Անցյալ դարասկզբին կարճատև, բայց մեզ հաջողվել է անկախ պետականություն հիմնել: Անկախության երազանքը, այնուամենայնիվ, չի ընդհատվել անգամ Խորհրդային Հայաստանում: Իբրև ազգ և իբրև պետություն՝ մենք այդ երազանքի, մեր պատմական երթի ժառանգորդն ենք՝ այդպիսով հաշվետու լինելով ու դասեր քաղելով անցյալից, նաև պատասխանատու լինելով ապագայի համար:
Անկախությունը հենց ինքն ամենամեծ, անսակարկելի արժեք է: Մեր անկախությունը պսակվել է ամենամեծ ձեռքբերումով՝ Արցախյան ազատամարտում մեր հաղթանակով, հակառակորդին պարտադրած խաղաղությամբ:
Անկախության ճանապարհը հեշտ չենք անցել, ձեռքբերումների կողքին արձանագրել ենք նաև թերացումներ, որոնց մի մասը առարկայական պատճառներ են ունեցել: Սակայն զարգանալու և չզիջելու, բարեկեցիկ, արժանապատիվ ու մրցունակ երկիր կառուցելու մեր հավաքական երազանքից չենք հրաժարվել:
Այսօր էլ Հայաստանի Հանրապետությունը, տարածաշրջանային ահագնացող անվտանգային սպառնալիքներին զուգահեռ, բազմաթիվ ներքին մարտահրավերներ է դիմագրավում: Հասարակական հարաբերություններում խորանում է անհանդուրժողականության ու թշնամանքի մթնոլորտը, մտահոգիչ է երկրի զարգացման ընթացքը:
Մենք գիտակցում ենք, որ մեր անկախ, ազգային պետականության առջև կանգնած բազմաթիվ մարտահրավերները հնարավոր է հաղթահարել միայն համազգային միասնականությամբ, անկախության արժեքներին ու նպատակների հավատարմությամբ և բարձր նշաձող ունեցող քաղաքական կամքով:
Սիրելի՛ հայրենակիցներ, շնորհավորում ենք Հայաստանի Հանրապետության Անկախության տարեդարձի առթիվ և համոզում հայտնում, որ միասին մեզ կհաջողվի մեր անկախության երթը նշանավորել անկասելի ձեռքբերումներով:
