Ազգային ժողովում քննարկվեց «ՀՀ կառավարության և Բուլղարիայի կառավարության միջև ՀՀ և Եվրոպական միության միջև առանց թույլտվության բնակվող անձանց հետընդունման ռեադմիսիայի մասին» համաձայնագրի կիրարկման արձանագրությունը վավերացնելու մասին օրենքի նախագիծը:
Միգրացիոն ծառայության պետ Արմեն Ղազարյանը տեղեկացրեց, որ կիրարկման արձանագրությունը հաստատվել է Կառավարության որոշմամբ, իսկ Սահմանադրական դատարանը որոշել էր, որ արձանագրության մեջ ամրագրված պարտավորությունները համապատասխանում են Սահմանադրությանը:
«Արձանագրությունները, որոնք այս համաձայնագրի շրջանակում վավերացվում են, նախատեսում են մի շարք պարտավորություններ երկու կողմերի համար: Արձանագրություններով սահմանվում են կողմերի իրավասու մարմինները, հետընդունման և տարանցման դիմումի ձևերը, հաղորդակցության միջոցները երրորդ երկրների քաղաքացիների և քաղաքացիություն չունեցող անձանց հետընդունման համար առերևույթ ապացույցի լրացուցիչ փաստաթղթերը, հարցազրույցների կազմակերպման կարգը, հետընդունման և տարանցման ընթացակարգերը, այդ թվում՝ ուղեկցորդների ուղեկցության վերադարձի դեպքում կիրառվող պայմանները, սահմանային անցման կետերը, ծախսերը, հաղորդակցության լեզուները»,- ասաց Ղազարյանը:
Արձանագրություններն ուժի մեջ կմտնեն ՀՀ-ԵՄ հետընդունման հարցերով համատեղ կոմիտեին՝ կողմերի անհրաժեշտ ներքին իրավական ընթացակարգերի ավարտման մասին ծանուցելուց հետո՝ երկրորդ ամսվա առաջին օրը:
Խորհրդարանը քննարկեց նաև ՀՀ և Բենիլյուքսի պետությունների (Բելգիայի Թագավորություն, Լյուքսեմբուրգի Մեծ Դքսություն, Նիդեռլանդների Թագավորություն) միջև «Եվրոպական միության և Հայաստանի Հանրապետության միջև` առանց թույլտվության բնակվող անձանց հետընդունման (ռեադմիսիայի) մասին» համաձայնագիրը կիրարկող արձանագրությունը վավերացնելու մասին նախագիծը, որով սահմանվում են նույն պարտավորությունները, ինչ նախորդ նախագծի դեպքում:
