Սրանով վերջնականապես չի լուծվելու ՍԴ թնջուկը՝ Ալեն Սիմոնյանը ՍԴ դատավորների ընտրության մասին
«Իշխանությունները ասել են, որ չեն ձևավորելու խամաճիկային Սահմանադրական դատարան, որ պատկանի իշխանությանը, այլ ձևավորելու են Սահմանադրական դատարան, որ լինելու է նոր, լինելու է սկզբունքային: Իսկ այդ առումով ԱԺ պատգամավորները քննարկումներից հետո կայացրել են իրենց որոշումը: Չեմ համարում, որ մենք որևէ մեկին դավաճանել ենք»,- հայտարարել է ԱԺ փոխնախագահ Ալեն Սիմոնյանը՝ լրագրողների հետ ճեպազրույցում անդրադառնալով ՍԴ դատավորների այսօրվա ընտրությունից հետո հնչած քննադատություններին: «Այսօր ընտրվել են նոր դատավորներ, որոնք կանեն իրենց աշխատանքը և չեն հանդիսանա ՀՀ գործող իշխանության ոչ սպասարկուները, ոչ էլ որևէ կապ են ունեցել»,- ասաց նա:
Սիմոնյանի խոսքով՝ իշխանությունն անելիք ունի ոչ միայն ՍԴ-ում, այլեւ ընդհանուր դատական համակարգում: ԱԺ փոխնախագահը նաև նշեց, որ ՍԴ դատավորների ընտրությամբ վերջնականապես չի լուծվելու ՍԴ թնջուկը: «Այնպես չէ, որ սա վերջնական լուծում է, նման բան չկա»,- նշեց նա:
ԱԺ փոխնախագահն անդրադարձավ նաև քաղաքացիների դժգոհությանը, երբ իշխանություններից ակնկալում են արագ, կտրուկ քայլեր: «Հասկանալով այդ պահանջները՝ մենք անում ենք ամեն ինչ, որ Հայաստանը ցնցումների չտանելով, հնարավորինս ճիշտ, օրինական լուծումը տանք: Վստահաբար կարող եմ պնդել, որ դա ստացվում է, ու մենք կունենանք դատական իշխանություն, այնպիսի դատական իշխանություն, որը համապատասխանում է նոր Հայաստանին»,- ասաց նա:
