ՀՀ վարչապետ Նիկոլ Փաշինյանը տեսանյութ է հրապարակել Լոռի Բերդից:
«Այսօրվա մեր այցելության վայրը Լոռի Բերդն է, որը Տաշիր-Ձորագետ կամ Լոռի կամ Կյուրիկյան թագավորության կենտրոնն է: Այն, ըստ էության, Բագրատունիների կազմում էր և Բագրատունիներից ուներ վասալային կախվածություն:
Մեր ամենալավ պահպանված բերդերից է, գտնվում է Ստեփանավանից մոտ 4 կմ հեռավորության վրա: Լոռի Բերդից աննկարագրելի տեսարան է բացվում»,- ասում է վարչապետը:
«Ի տարբերություն իմ այցելած նախորդ բերդերի՝ շատ հեշտ է այցելել: Եթե չեք եղել, անպայման այցելեք: Մուտքը տոմսով է»,- տեղեկացնում է վարչապետը՝ ընդգծելով, որ դա կարևոր է բերդի պահպանության համար:
Վարչապետը շրջել է բերդի տարածքով՝ ցույց տալով բերդի տարածքում գտնվող բաղնիքը: Վարչապետին ուղեկցել են նաև դուստրերը:
Մանրամասները՝ տեսանյութում:
