Ազգային ժողովի մարդու իրավունքների պաշտպանության և հանրային հարցերի մշտական հանձնաժողովի և «Ազգային Արժեք» մշակույթի համահայկական հիմնադրամի համատեղ նախաձեռնությամբ դեկտեմբերի 15-ին Աբովյանի «Կանանց և անչափահասների» քրեակատարողական հիմնարկում անցկացվել է «Կյանքը հրաշալի է» միջոցառումը:
Հիմնադրամի և խորհրդարանական հանձնաժողովի միջև կնքված համագործակցության հուշագրի համաձայն` միջոցառումներ կանցկացվեն Հայաստանի բոլոր ՔԿՀ-ներում, ինչպես նաև տարբեր հիվանդանոցներում, որտեղ բուժվում են երեխաներ:
Կանանց և անչափահասների քրեակատարողական հաստատությունում անցկացված մշակութային միջոցառման նպատակն էր՝ ազատությունից զրկվածներին նկարչության միջոցով փոխանցել լավատեսություն, ուժ և հավատ:
Հայտնի նկարիչ Աշոտ Թադևոսյանը, որը հիմնադրամի հոգաբարձուների խորհրդի նախագահն է, կազմակերպել է միաժամանակյա նկարչության սեանս. նա նկարել է դատապարտյալ կանանց, իսկ դատապարտյալ կանայք՝ Աշոտ Թադևոսյանին: Դա ուղեկցվել է հայտնի քանոնահարուհի Մարիաննա Գևորգյանի գեղեցիկ կատարմամբ:
ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի և «Ազգային Արժեք» մշակույթի համահայկական հիմնադրամի ներկայացուցիչներն ամփոփել են մրցույթի արդյունքները, և լավագույն նկարների հեղինակ կանայք պարգևատրվել են մրցանակներով, որոնք հանձնել են Աշոտ Թադևոսյանը և Նաիրա Զոհրաբյանը:
Հանձնաժողովի և համահայկական հիմնադրամի հաջորդ միջոցառումը նախատեսված է «Արմավիր» քրեակատարողական հիմնարկում:
