Ռուսաստանի արտաքին գործերի նախարար Սերգեյ Լավրովը ժամանել է Բաքու՝ մասնակցելու Ասիայում փոխգործակցության և վստահության ամրապնդման միջոցառումների համաժողովի յոթերորդ գագաթնաժողովին՝ հաղորդում է «Ինտերֆաքս»-ը։
Նախատեսվում է, որ հանդիպման արդյունքում կընդունվեն Բաքվի հռչակագիրը և գագաթնաժողովի դերի ու արդյունավետության բարձրացմանն ուղղված որոշումների փաթեթ։
Համաժողովի օրակարգում ընդգրկված են Ասիայում վստահության ամրապնդման, խաղաղության և անվտանգության ապահովման, ինչպես նաև համաժողովի հետագա ինստիտուցիոնալ զարգացման հարցերը: Մասնակիցները կքննարկեն գործնական փոխգործակցության հեռանկարները տրանսպորտի, թվայնացման, տնտեսության և այլ առաջնահերթ ոլորտներում։ Նախատեսվում է նաև կարծիքների փոխանակում տարածաշրջանային ու միջազգային հիմնական հարցերի շուրջ։
Միջազգային այս ֆորումը հիմնադրվել է 1992 թվականին Ղազախստանի նախաձեռնությամբ և ներկայումս միավորում է 28 պետություն: Մասնակից երկրները համագործակցում են հինգ ուղղությամբ՝ ռազմաքաղաքական, տնտեսական, մարդասիրական, բնապահպանական և նոր մարտահրավերների ու սպառնալիքների հարցով։
