Թուրքիայի մեծությամբ երրորդ քաղաքի՝ Իզմիրի քաղաքապետ Ջեմիլ Թուգայը անդամակցել է իշխող «Արդարություն և զարգացում» կուսակցությանը։ Կուսակցության կրծքանշանը նրան անձամբ հանձնել է Թուրքիայի նախագահ և ԱԶԿ առաջնորդ Ռեջեփ Թայիփ Էրդողանը։ Այսպիսով` Իզմիրն առաջին անգամ անցել է իշխող կուսակցության կառավարման ներքո։
Թուգայը երկար տարիներ եղել է Թուրքիայի խոշորագույն ընդդիմադիր՝ Ժողովրդահանրապետական կուսակցության անդամ և այս տարվա հունիսին լքել է կուսակցությունը՝ պատճառաբանելով, որ անընդունելի է համարում կուսակցության ներսում ստեղծված իրավիճակը։
Սեպտեմբերի վերջին Անկարայի քաղաքապետ Մանսուր Յավաշը նույնպես հայտարարել էր Ժողովրդահանրապետական կուսակցությունից դուրս գալու մասին՝ նշելով, որ շարունակելու է իր քաղաքական ուղին որպես անկախ թեկնածու։ Միևնույն ժամանակ, նա հանդիպել էր Էրդողանի հետ, ինչի համար արժանացել էր քննադատության։
Ժողովրդահանրապետական կուսակցության ներքին ճգնաժամը սրվել է 2023 թվականի 38-րդ համագումարի շուրջ ընթացող դատական գործընթացներից հետո, երբ քննարկվում էր կուսակցության ղեկավարության փոփոխության հարցը։ Դրանից հետո կուսակցության նախկին նախագահ Օզգյուր Օզելը և 90 պատգամավոր դուրս են եկել ԺՀԿ-ից և հիմնել Նոր կուսակցությունը։
