Պաշտոնական այցով Հայաստանում գտնվող Իրանի Իսլամական Հանրապետության սպորտի և երիտասարդության նախարար Ահմադ Դոնիամալին այսօր այցելել է մարզական և կրթական մի շարք հաստատություններ՝ ենթակառուցվածքներին ծանոթանալու և երկկողմ համագործակցության զարգացման հեռանկարները քննարկելու նպատակով։ Այս մասին տեղեկացնում են ԿԳՄՍՆ-ից:
ՀՀ ԿԳՄՍ նախարարության արտաքին կապերի և սփյուռքի վարչության պետ Արկադի Պապոյանի, Սպորտի կառավարման կենտրոնի տնօրեն Խորեն Զարգարյանի և ՀՖՖ գլխավոր քարտուղար Էդգար Պետրոսյանի ուղեկցությամբ ԻԻՀ սպորտի և երիտասարդության նախարարը նախ այցելել է ՀՖՖ տեխնիկական կենտրոն-ֆուտբոլի ակադեմիա, ծանոթացել մարզումային պայմաններին։ Քննարկվել են ֆուտբոլի ոլորտում համագործակցության խորացման և մասնագիտական փորձի փոխանակման հնարավորությունները։
Հաջորդիվ Ահմադ Դոնիամալին այցելել է Հայաստանի ֆիզիկական կուլտուրայի և սպորտի պետական ինստիտուտ։ Ռեկտոր Տիգրան Սիմոնյանը ներկայացրել է բուհի կրթական և գիտահետազոտական գործունեությունը, մասնավորապես՝ «Սպորտ լաբ» գիտահետազոտական կենտրոնը, որտեղ իրականացվում են հետազոտություններ սպորտային ֆիզիոլոգիայի, կենսամեխանիկայի և վերականգնողական գիտության բնագավառում։
Բարձրաստիճան հյուրը շրջել է ըմբշամարտի, ձյուդոյի, ծանրամարտի և սպորտային մարմնամարզության մարզադահլիճներում՝ ծանոթանալով մարզումային պայմաններին։
Կողմերը քննարկել են սպորտային կրթության, գիտության և հետազոտությունների ոլորտներում համագործակցության ընդլայնման հնարավորությունները՝ կարևորելով մասնագիտական փորձի փոխանակումը, համատեղ գիտահետազոտական ծրագրերի իրականացումը, աշխատաժողովների և կրթական միջոցառումների կազմակերպումը։
Այցի շրջանակում Իրանի սպորտի և երիտասարդության նախարարը հանդիպել է նաև Հայաստանի հակադոպինգային գործակալության ներկայացուցիչների հետ։ Քննարկվել են դոպինգի կանխարգելման, հակադոպինգային կրթության, մասնագիտական փորձի փոխանակման և համատեղ նախաձեռնությունների իրականացման հարցեր։
