Եմենի խորհրդարանը հաստատել է համընդհանուր զորահավաքի առաջարկը՝ երկրում գործող հութների դեմ պայքարելու և շարժմանը դիմակայելու համար:
Ալ Ջազիրայի տվյալով՝ Նախագահական կառավարման խորհրդի ղեկավար Ռաշադ ալ-Ալիմին կոչ է արել քաղաքացիներին՝ ցանկացած հնարավոր ձևով ներդրում ունենալ և միանալ Եմենի կառավարական ուժերին։ Նա հավելել է՝ կառավարության կողմն անցնելու դեպքում հութիների աջակիցները համաներում կստանան։
Ավելի վաղ «Անսար Ալլահ» շարժումը սկսել էր հարվածներ հասցնել Եմենի կառավարական ուժերին և վերահսկողություն հաստատել Կարմիր ծովի ափամերձ գոտու, ինչպես նաև Բաբ էլ-Մանդեբ նեղուցի հարակից տարածքների նկատմամբ։ Մարտերը շարունակվում են երկրի հարավ-արևմուտքում։
Զուգահեռ, հութիները հարվածում են Սաուդյան Արաբիայի տարածքին, որն աջակցում է Եմենի կառավարական ուժերին: Իրանի աջակցությունը վայելող հութիները վերահսկում են Եմենի բնակչության զգալի մասը, այդ թվում՝ մայրաքաղաք Սանաան:
