Ալիևը հայտարարել է Ռուսաստանի և Ադրբեջանի միջև հարաբերությունների լիակատար կարգավորման մասին
Ադրբեջանի և Ռուսաստանի միջև հարաբերություններում առկա խնդիրները մնացել են անցյալում, դրանք ամբողջովին կարգավորվել են` հայտարարել է Ադրբեջանի նախագահ Իլհամ Ալիևը։
«Շփումներ են տեղի ունենում տարբեր մակարդակներում՝ կառավարությունների միջև, միջկառավարական հանձնաժողովի համանախագահների, արտաքին գործերի նախարարությունների և նախագահի վարչակազմերի միջոցով։ Հետևաբար, կարծում եմ, որ այս առումով ամեն ինչ լավ է ընթանում, և մենք ուրախ ենք դրա համար»,- նշել է Ադրբեջանի նախագահը։
Նա ասել է, որ ՌԴ պաշտոնյաները, այդ թվում՝ նախագահ Վլադիմիր Պուտինը, նույնպես ընդունել են երկկողմ հարաբերությունների դինամիկան:
Ալիևը հավելել է, որ Ռուսաստանի և Ադրբեջանի միջև հարաբերությունները կարևոր են ինչպես երկկողմ ձևաչափի, այնպես էլ ավելի լայն աշխարհագրության համար։
«Հարաբերությունները ներառում են ինչպես փոխգործակցության ավանդական ոլորտները, այնպես էլ այսօր ի հայտ եկող նոր ուղղությունները։ Իհարկե, շատ կարևոր դեր են խաղում տրանսպորտը, առևտուրը և հումանիտար համագործակցությունը»,- ասել է Ադրբեջանի նախագահը։
