Սաուդյան Արաբիան հույս ունի քաղաքացիական միջուկային էներգիայի համաձայնագիր կնքել ԱՄՆ-ի հետ թագաժառանգ Մուհամմեդ բեն Սալմանի՝ Վաշինգտոն այցի ընթացքում։ Այս մասին հաղորդում է Reuters-ը:
Գործակալության տվյալով՝ Էր Ռիադը նաև ձգտում է ԱՄՆ-ից ստանալ անվտանգության երաշխիքներ, առաջադեմ արհեստական բանականության տեխնոլոգիաների հասանելիություն և քաղաքացիական միջուկային ծրագրի զարգացման մասին պայմանավորվածություն:
Ավելին, Սաուդյան Արաբիան ակնկալում է, որ ԱՄՆ-ն կհաստատի անհրաժեշտ ամենաառաջադեմ համակարգչային չիպերի մատակարարումը երկիր՝ իր սեփական արհեստական բանականության համակարգերի մշակման ու Vision 2030 ծրագրի իրականացման համար։
Վաշինգտոնն ավելի վաղ պնդել է, որ միջուկային համագործակցությունը հնարավոր է միայն այն դեպքում, եթե Ռիադը հրաժարվի ուրանի հարստացումից և վառելիքի վերամշակումից՝ գործընթացներ, որոնք կարող են ռազմական կիրառություն ունենալ։ Այս պայմանների շուրջ բանակցությունները շարունակվում են։
Մայիսին Վաշինգտոնն ու Էր Ռիադը 300 մլրդ դոլար ընդհանուր գումարի համաձայնագրեր են կնքել: Թագաժառանգի խոսքով՝ դրանից հետո երկրները պետք է անցնեին համագործակցության երկրորդ փուլին: Այդ աշխատանքի շրջանակում ներդրումային պարտավորությունների ընդհանուր ծավալը պետք է հասներ 1 տրլն դոլարի:
