Հայտնի են դարձել Ադրբեջանի Անվտանգության խորհրդի անդամ, նախագահի աշխատակազմի նախկին ղեկավար Ռամիզ Մեհտիևի գործունեության մանրամասները, որոնք ուղղված են պետական իշխանության բռնազավթմանը և պետական դավաճանությանը: Այդ մասին տեղեկություններ են հրապարակել ադրբեջանական լրատվամիջոցները:
Նշվում է, որ Մեհտիևը պետական հեղաշրջման ծրագիր է մշակել, որը նախատեսվում էր իրականացնել Ռուսաստանի աջակցությամբ: Տեղեկությունների համաձայն՝ այդ ծրագիրը նա փոխանցել է Մոսկվային՝ հույս ունենալով ստանալ ՌԴ աջակցությունը՝ օգտվելով Մոսկվայի և Բաքվի հարաբերություններում լարվածությունից:
Մեհտիևի ծրագիրը, ըստ լրատվամիջոցների, նախատեսել է իշխանության ժամանակավոր մարմնի՝ անցումային շրջանի պետական խորհրդի ստեղծում, որը պետք է գլխավորեր անձամբ ինքը: Մեհտիևը ռուսական կողմին է փոխանցել նաև այդ խորհրդի ենթադրյալ կազմը։
Ծրագիրը բացահայտվել է Դուշանբեում՝ Ադրբեջանի և Ռուսաստանի նախագահների հանդիպման ժամանակ. ռուսական կողմը Բաքվին տեղեկատվություն է տրամադրել Մեհտիևի առաջարկի մասին:
