Ազգային ժողովի նախկին պատգամավոր Խաչատուր Քոքոբելյանի հոր առևանգման գործով երկու անձ կալանավորվել է: Կալանավորվածներից մեկը նախկին պատգամավոր, ՀՅԴ Գերագույն մարմնի անդամ Սուրեն Մանուկյանն է, մյուսը՝ Մանուկյանի մտերիմ Արմեն Քամալյանը: Մանուկյանի փաստաբանը, սակայն, դատարանի վճիռն անհիմն է համարում և մտադիր է այն բողոքարկել Վճռաբեկ դատարանում: Բացակայում են կալանավորման հիմքերը՝ վստահ է Մանուկյանի փաստաբան Սերգեյ Ոսկանյանը և շեշտում է՝ Սուրեն Մանուկյանը նախկինում կալանավորված չի եղել, անչափահաս 3 երեխայի հայր է, փախուստի դիմելու փորձ չի կատարել:
Սերգեյ Ոսկանյան (Սուրեն Մանուկյանի փաստաբան) - Չկա այնպիսի մի պահվածք, մի գործողություն, փախուստի փորձ, որը հնարավորություն կտար նախաքննական մարմնին կամ դատարանին ենթադրելու, որ նա, մնալով ազատության մեջ, կարող էր դիմել փախուստի:
Հուլիսի 27-ին Սուրեն Մանուկյանն ու Արմեն Քամալյանը առևանգել ու մեկ շաբաթ անազատության մեջ են պահել 83-ամյա Գրիշա Քոքոբելյանին: Վաղ առավոտյան, դիմակավորված դարանակալել են տան մոտ և Opel մակնիշի ավտոմեքենայի մեջ սպասել են Գրիշա Քոքոբելյանին: ֆիզիկական ուժ գործադրելով ու նրա կամքին հակառակ նստեցրել են ավտոմեքենան և աչքերը փակ տեղափոխել Լոռու մարզի Ծաթեր բնակավայր և պահել նախապես վարձակալված տանը. մանրամասներ է ներկայացնում գործը քննող ավագ քննիչ Արթուր Այվազյանը:
Արթուր Այվազյան (ՀՀ ՔԿ ՄԴՈւՔՎ ՀԿԳ ավագ քննիչ) - Հանցավոր խմբի դեռևս ինքնությունը չպարզված անձը դիմակավորված, մինչև 2022 թվականի օգոստոսի 2-ը մշտապես գտնվել է այդ տանը՝ վերահսկելով Գրիշա Քոքոբելյանին:
Սուրեն Մանուկյանն ու Արմեն Քամալյանը մեղադրանքը չեն ընդունում, սակայն քննիչի խոսքով՝ նախաքննական մարմինը ապացույցներ ներկա պահին էլ ունի: Շատ բան չեն մանրամասնում՝ նախաքննական գաղտնիքի չհրապարակման ու քննությանը չվնասելու համար: Ըստ Այվազյանի՝ իրականացվել են քննչական և վարութային մեծածավալ գործողություններ, ուսումնասիրվել են Հայաստանի մի քանի մարզերի տարբեր հասցեներում տեղադրված տեսանկարահանող սարքերը, բջջային կապի օպերատորներից ստացել են քննությանը հետաքրքրող տվյալները:
Արթուր Այվազյան - Հասկանալով, որ մերկացվել է իրենց գործողությունների մեծ մասը, Սուրեն Մանուկյանն ընդունել է իր՝ Ծաթեր գյուղում գտնվելու հանգանամքը թե՛ հուլիսի 27-ին, այսինքն՝ Գրիշա Քոքոբելյանին առևանգելու օրը, թե՛ օգոստոսի 2-ին նույն գյուղում գտնվելու հանգամանքները:
Սուրեն Մանուկյանի փաստաբանն էլ չի բացառում, որ առևանգում եղել է, չի հերքում, որ իր պաշտպանյալը եղել է Ծաթեր գյուղում, բայց...
Սերգեյ Ոսկանյան - Ամբողջ հարցն այն է, որ պարոն Մանուկյանը չի հերքում, ընդունում է, որ, այո, իր կողմից վարած ավտոմեքենայով եղել է այդ վայրում, գնացել է այդ վայր, գյուղ, այդ տուն, բայց ինքը այդ տունը վարձակալել է այլ նպատակների համար:
83-ամյա Գրիշա Քոքոբելյանին առևանգած անձինք նրան հարազատներին վերադարձրել են՝ թողնելով անտառապատ տարածքում. զանգել ու տեղեկացրել են գտնվելու վայրի մասին: Այս պահին դեռևս քննությամբ ապացուցված չէ, որ առևանգողները Քոքոբելյանների ընտանիքից գումար են պահանջել:
Արթուր Այվազյան - Ըստ ստացված տեղեկությունների՝ հանցագործները տուժող Գրիշա Քոքոբելյանի հարազատներից պահանջել են գումար, որի չափը նշված չէ, և 40 հազար դոլար փոխանցել են, որից հետո բաց են թողել Գրիշա Քոքոբելյանին, սակայն այդ օպերատիվ տեղեկություների վերաբերյալ վարույթով փաստական տվյալներ, ապացույցների համակցություն ձեռք բերված չէ:
Սուրեն Մանուկյանի փաստաբանն էլ այլ բանի վրա է ուշադրություն հրավիրում. Մանուկյանին այլ գործով, որով նա տուժող է, Քննչական մարմին են կանչել, սակայն ճանապարհին ձերբակալել են դիմակավորված անձինք:
Սերգեյ Ոսկանյան - Անձն իր ծանուցագրի ուժով, պարտավորվածությամբ ներկայանում է հարցաքննության, սակայն կանգնեցվում է լրիվ այլ անձանց կողմից ու լրիվ այլ դեպքով պայմանավորված, ու նրա նկատմամբ ուժ գործադրելով, հարկադրաբար ձերբակալում են ու տեղափոխում քննչական մարմին:
Առևանգման գործը դեռևս քննության փուլում է, և շատ հանգամանքներ ու փաստեր ի հայտ կգան՝ վստահ է ավագ քննիչ Այվազյանը: Նա հավելեց, որ տանտերը, որտեղ առևանգումից հետո պահվել է Գրիշա Քոքոբալյանը, ճանաչել է Սուրեն Մանուկյանին: Ավելին՝ ըստ տանտիրոջ, Սուրեն Մանուկյանը կեղծել է անունը և ներկայացել որպես Արամ:
Հեղինակ՝ Անի Օհանյան
