Առողջապահության նախարարը՝ հոկտեմբերի 1-ից ուժի մեջ մտնող հակահամաճարակային նոր սահմանափակումների մասին
Հոկտեմբերի 1-ից բոլոր գործատուները, այդ թվում՝ պետական կառավարման մարմինները, պետք է հետևեն սահմանված հակահամաճարակային սահմանափակումներին. Կառավարության նիստին տեղեկացրել է ՀՀ առողջապահության նախարար Անահիտ Ավանեսյանը՝ ներկայացնելով մանրամասներ:
«Հոկտեմբերի 1-ից աշխատակիցն աշխատանքի ներկայանալիս կամ պետք է ներկայացնի ՊՇՌ թեստի բացասական տեղեկանք, կամ հակացուցման մասին բժշկի կողմից տրված տեղեկանք, բացառություն են կազմում պատվաստված քաղաքացիներն ու հղիները: Սա ընդհանուր կանոն է»,- նշեց Անահիտ Ավանեսյանը:
Նա շեշտեց՝ այս սահմանափակումներն իրականացնում են որպես համալիր հակահամաճարակային միջոցառումների կարևոր ֆիլտր:
«Դրանք պետք է օգնեն հավաստիանալու, որ աշխատակիցը չի վարակում իր գործընկերներին, այն քաղաքացիներին, ում սպասարկում է: Մենք ունենք համանման կանոն մեր երկիր գալիս՝ ունենալ ՊՇՌ բացասական թեստ, եթե, իհարկե, մարդը պատվաստված չէ»,- մեկնաբանեց Ավանեսյանը:
Ինչ վերաբերում է պատվաստման առաջին դեղաչափը ստացած քաղաքացիներին, նախարարը մանրամասնեց. «Մինչև երկրորդ դեղաչափի ստանալը քաղաքացին կարիք չունի ՊՇՌ թեստի պատասխան ներկայացնել»:
Ժամկետը լրանալուց հետո քաղաքացին պետք է արդեն ստանա պատվաստման երկրորդ դեղաչափը:
