Արդարադատության նախարարության թվայնացված ծառայություններին ավելացել է ևս մեկը
Եթե նախկինում պետք էր թղթային դիմումը փոստով ուղարկել առաջին ատյանի դատարան, ապա՝ դատարանի կազմած ակտը կրկին թղթով ուղարկել պարտք ունեցող քաղաքացուն, հիմա այդ ամենն օնլայն է՝ մի քանի կոճակ սեղմելով:
Պետք է մտնել նույնականացման քարտի բջջային նույնականացմամբ և համակարգն արդեն կճանաչի ձեզ, կմուտքագրի տվյալները: Յուրաքանչյուրն ունի իր անձնական էջը, բոլոր դիմումների պատուհանները:
Տիգրան Դադունց (ԱՆ «Օրենսդրական զարգացման և իրավական հետազոտությունների կենտրոն» հիմնադրամի տնօրեն) - Վճարման կարգադրությունների վարույթը գումարի բռնագանձումների ներկայացման համար ամենահեշտ ամենաօպտիմալ տարբերակն է, այս համակարգի շնորհիվ ամբողջ գործընթացը, սկսած դիմումների ներկայացումից, ծանուցումներ, դատական ակտի ներկայացում, թվայնացվել և էլեկտրոնային է դարձել:
Համակարգը քաղաքացիների ու դատարանների համար հասանելի է մեր երկրի տարածքում: Համակարգը մշակել են Միացյալ Նահանգների միջազգային ծրագրի շրջանակում, դատարաններն էլ երկար փորձարկել, թեստավորել են ԲԴԽ-ի աջակցությամբ:
Մարիամ Գալստյան (ԱՆ հակակոռուպցիոն քաղաքականության մշակման և մոնիթորինգի վարչության պետ) - Անձը պետք է պահպանի իրեն տրված գաղտնաբառը և հետևի ընթացքին: Համակարգը հետադարձ կապի հնարավորություն տալիս է: Գլխավոր դատախազությունը անձանց կտեղեկացնի, թե ինչ ընթացք է տրվել:
«Լավագույն մեթոդը անձին պաշտպանելու և կոռուպցիոն խնդիրը բացահայտելու՝ անանուն կերպով ազդարարելն է». հենց այս սկզբունքով www.azdararir.am միասնական հարթակում կարելի է, այսպես ասած, օնլայն ազդակ ուղարկել՝ բացահայտելու կոռուպցիոն հանցագործությունը:
Ձեր հայտը կտեսնի միայն գլխավոր Դատախազությունը: Գործին ընթացք տալ կորոշի արդեն Դատախազությունը: 200-ից ավելի հաղորդում ստացել են, հաղորդումների 60 տոկոսը օպերատիվ հետախուզական մարմինների կողմից ստուգվել է: 30 տոկոսի դեպքերով հարուցվել է քրգործ:
Եվ եթե որոշել եք, օրինակ՝ ամուսնանալ, քաղաքացիական կացության ակտերի գրանցման համար ընտանեկան կարգավիճակի մասին տեղեկանքը առաջին անգամ կարելի է ստանալ օնլայն:
Վահե Դանիելյան (Արդարադատության նախարարի տեղակալ) - Մենք էլեկտրոնային ապոստիլի հնարավորություն ենք ստեղծել, քաղաքացին էլեկտրոնային ապոսլտիլը ստանում է իր մեյլի վրա և կարող է օգտագործել ՀՀ-ից դուրս ցանկացած վայրում: Անհրաժեշտ է անձնագիրը նկարած կցել, որպեսզի քաղաքացուն իդենտիֆիկացնենք: Եվ այդ ծառայությունը հնարավոր է ստանալ: Մենք նպատակ ենք դրել բոլոր ծառայությունները թվայնացնելու, այդ ծառայությունները մատուցել մեկ հարթակի միջոցով, որտեղ ոչ միայն արդարադատության նախարարության, այլև պետական գերատեսչությունների բոլոր ծառայությունները այդ հարթակով կմատուցվեն: Շուտով կայքը պատրաստ կլինի:
Ի դեպ, կարող են օգտվել նաև քաղաքացիները, որ երկրում չեն: Մոտ հազար հոգի արդեն օգտվել է ստորագրության իսկական լինելը հաստատող հատուկ դրոշմակնիքի՝ ապոստիլի ծառայությունից:
