Փաշինյանը վստահեցրեց՝ քաղաքացիները կպատվաստվեն միայն պիտանելիության ժամկետի մեջ գտնվող պատվաստանյութերով
Առողջապահության նախարարի պաշտոնակատար Անահիտ Ավանեսյանը Կառավարության այսօրվա նիստում տեղեկացրեց, որ արդեն իսկ կա մշակված հավելված, որի միջոցով քաղաքացիները կունենան իրենց պատվաստված լինելու հավաստումը:
«Պատվաստման գործընթացն ամբողջությամբ էլեկտրոնային հարթակում գրանցվում է, և այդտեղից ինֆորմացիան ավտոմատ կերպով արտահայտվելու է հավելվածով: Հստակ ուղեցույցը մեր կայքում կլինի այսօր կամ վաղը: Եվ ինչպես տեսնում ենք՝ որպես ճամփորդելու պայման, էլեկտրոնային այս նորամուծությունները շատ կարևոր դեր են խաղում»,- նշեց Ավանեսյանը:
Անդրադառնալով պատվաստանյութերի մասով հերթական շահարկմանը, թե Հայաստանը պատվաստանյութ է բերել, որի պիտանելիության ժամկետը լրանում է 1 ամսից, վարչապետի պաշտոնակատար Նիկոլ Փաշինյանը նշեց, որ աշխարհում բոլոր հիվանդությունների դեմ պատվաստանյութերը ունեն պիտանելիության ժամկետ: Առավել ևս նոր թողարկված պատվաստանյութերը ունեն պիտանելիության կարճ ժամկետ:
«Մենք պետական միջոցներ ենք օգտագործում այդ պատվաստանյութերը բերելու համար: Պատկերացրեք, որ ստացվի իրավիճակ, որ ձեռք բերենք պատվաստանյութերը մեծ քանակով: Օրինակ՝ ՌԴ-ի հետ պայմանավորվածություն ունենք, որ 1 մլն դոզա պատվաստանյութ ենք ձեռք բերելու, նաև մյուս գործընկերներից:
Պատկերացրեք՝ բերենք այդ ամեն ինչը, պետական ահռելի միջոցները ծախսենք, ու վերջում պարզվի, որ մենք սկզբունքորեն չենք պատվաստվում: Կստացվի շատ վատ բան, կրկնակի, եռակի վատ էֆեկտ: Այնպես որ այդ շահարկումներին չպետք է ուշադրություն դարձնել: Ամեն ինչ ունի իր պիտանելիության ժամկետը: Բնականաբար, քաղաքացիները կպատվաստվեն միայն պիտանելիության ժամկետի մեջ գտնվող պատվաստանյութերով»,- նշեց Փաշինյանը:
