Արցախի ԱԻ պետական ծառայության փրկարար ուժերի վարչության ծառայողները՝ քաղաքացիական պաշտպանության հարցերի, արտակարգ իրավիճակների կանխարգելման և հետևանքների վերացման հիմնական միջոցառումների պլանի համաձայն, Սարսանգի ջրամբարում անցկացրել են ջրասուզական պարապմունքներ:
Հատուկ անջրանցիկ հանդերձանքով ջրափրկարարներն իրականացրել են ստորջրյա վարժանքներ, որոնք նպատակաուղղված են բարձրացնելու պարապմունքի մասնակիցների տեսական ու գործնական ունակությունները, մասնավորապես արտակարգ իրավիճակներում ջրափրկարարական աշխատանքները բարձր մակարդակով իրականացնելու առումով:
ԱԻ ծառայությունում նմանատիպ դասընթացներ ու գործնական պարապմունքներ հաճախակի են կազմակերպվում և գտնվում են ԱԻ պետական ծառայության ղեկավար կազմի մշտական ուշադրության կենտրոնում: Ջրասուզական թեմատիկ դասընթացներ կազմակերպվել էին նաև հուլիս-օգոստոս-սեպտեմբեր ամիսներին:
Ծառայությունը համալրված է համապատասխան գույքով ու տեխնիկական հատուկ միջոցներով՝ ջրասուզական և փրկարարական աշխատանքները տարվա բոլոր եղանակներին բարձր մակարդակով կազմակերպելու համար:
