2022-ին նախատեսվում է առողջապահական բյուջեի 5 տոկոսի աճ: Այս մասին ԱԺ նիստում հայտնեց ՀՀ առողջապահության նախարար Անահիտ Ավանեսյանը:
Նախարարն անդրադարձավ մատուցվող ծառայությունների տարբեր ուղղություններին:
Ծրագիրը, որում ակնկալվում է բյուջետային միջոցների ավելացում, ըստ նախարարի, զինծառայողներին ու փրկարար ծառայողներին և նրանց ընտանիքի անդամներին բժշկական օգնության ծառայությունների ծրագիրն է:
«Ծրագիրը 2 տարի է՝ իրականացվում է օֆերտայի սկզբունքով, բժշկական կենտրոնները սահմանափակված չեն իրենց տարեկան բյուջեի շրջանակում: Ըստ դիմելիության՝ ըստ կատարողականի ստանում են պետության կողմից փոխհատուցումներ:
Սա մի կողմից քաղաքացիներին հնարավորություն է ընձեռում ազատ կերպով ընտրելու այն բժշկական կենտրոնները, որտեղից նրանք ուզում են ստանալ այդ ծառայությունները, խուսափելու հերթագրումներից: Մյուս կողմից՝ սա հնարավորություն է տալիս ճիշտ ժամանակին մատուցելու մեր զինծառայողներին և նրանց ընտանիքներին պատշաճ բժշկական օգնություն»,- ասաց Ավանեսյանը:
