ՀՀ վարչապետ Նիկոլ Փաշինյանը Կառավարության նիստի ժամանակ հիշեցրեց, որ երկուշաբթի օրը գրավոր ընթացակարգով Շիրակի մարզպետ է նշանակվել Նազելի Բաղդասարյանը, որն առաջին անգամ է այդ կարգավիճակով մասնակցում Կառավարության նիստին:
«Տիկին Բաղդասարյան, շնորհավորում ենք Ձեզ նշանակման կապակցությամբ և հաջողություններ ենք մաղթում»,- ասաց Նիկոլ Փաշինյանը՝ փաստելով, որ Բաղդասարյանը երկրորդ կին մարզպետն է և կրկին՝ Շիրակում:
«Ունենալով Ձեր վստահությունը՝ գրավոր ընթացակարգով իմ նշանակումը եղավ: Լիահույս եմ, որ այն բեռը, որը դրված է իմ ուսերին, կկարողանամ իրականացնել մեծ պատասխանատվությամբ և նվիրումով, իմ համեստ հմտություններն ու կարողությունները կկարողանամ օգտագործել ի շահ Շիրակի մարզի և ՀՀ-ի»,- ասաց Նազելի Բաղդասարյանը:
