Նոյեմբերի 10-ին ԱԺ պետական-իրավական հարցերի մշտական հանձնաժողովի հերթական նիստում առաջին ընթերցմամբ քննարկվել է Կառավարության հեղինակած ««Հանրային ծառայության մասին» օրենքում փոփոխություն կատարելու մասին» օրենքի նախագիծը:
ՀՀ վարչապետի աշխատակազմի սփյուռքի գործերի գլխավոր հանձնակատար Զարեհ Սինանյանը, ներկայացնելով փոփոխություն կատարելու անհրաժեշտությունը, նշել է, որ դա պայմանավորված է ՀՀ Կառավարության հնգամյա ծրագրի այն պահանջով, ըստ որի սահմանվել է ստեղծել Սփյուռքի գործերի հանձնակատարի ինստիտուտ:
Զարեհ Սինանյանի խոսքով՝ ինստիտուտի ներդրման նպատակն է զարգացնել Հայաստան-Սփյուռք գործակցությունը, բարձրացնել բնագավառում իրականացվող աշխատանքների արդյունավետությունը, ապահովել հայ համայնքների միջև կայուն հարաբերությունները, ինչպես նաև աջակցել հայ ինքնության պահպանմանը, հայրենադարձությանն ու Հայաստանում սփյուռքահայերի ինտեգրմանն ուղղված միջոցառումների կազմակերպմանը:
Սփյուռքի գործերի հանձնակատարները նշանակվում են ՀՀ վարչապետի որոշմամբ՝ Սփյուռքի գործերի գլխավոր հանձնակատարի առաջարկությամբ՝ օտարերկրյա պետություններում հասարակական հիմունքներով խորհրդականի կարգավիճակով: Նրանք չեն վարձատրվում, չունեն նորմավորված աշխատանքի և աշխատաժամանակի ռեժիմ:
Հիմնական զեկուցողն առաջարկել է օրենքի նախագծի քննարկման համար սահմանել հատուկ՝ 24 ժամվա ընթացակարգ:
ՀՀ վարչապետի աշխատակազմի Սփյուռքի գործերի գլխավոր հանձնակատարը, անդրադառնալով պատգամավորների՝ հանձնակատարների հասարակական հիմունքներով աշխատելու մտահոգությանը, նշել է, որ գաղափարն ու անհրաժեշտությունը ծնվել են Սփյուռքում:
Հարակից զեկուցմամբ Վահագն Հովակիմյանն ընդգծել է, որ ինստիտուտի հիմնումը բյուջետային ծախսեր չի ենթադրում և առաջարկել է օրենքի նախագծին տալ դրական եզրակացություն:
Հանձնաժողովը դրական եզրակացություն է տվել օրենքի նախագծին:
