ԵՊՀ-ն կարևորում է գիտական համայնք-պետություն համագործակցությունը. համագործակցության հուշագիր Մայր բուհի և ՀՀ սոցապնախարարության միջև
ԵՊՀ ռեկտորի ժամանակավոր պաշտոնակատար Հովհաննես Հովհաննիսյանն ու Աշխատանքի և սոցիալական հարցերի նախարար Նարեկ Մկրտչյանն այսօր ստորագրել են երկու կառույցների միջև համագործակցության հուշագիր՝ արժևորելով պետություն-գիտական համայնք կապի ամրապնդումը։
Երկու կառույցների միջև համագործակցության նպատակն է նպաստել ԵՊՀ ուսանողների մասնագիտական հմտությունների և կարողությունների կատարելագործմանը, աշխատաշուկայում մրցունակ լինելու կարողունակությունների զարգացմանը, ինչպես նաև ապահովել նախարարության և համալսարանի մասնագիտական ներուժի փոխադարձ ներգրավումը։
Աշխատանքի և սոցիալական հարցերի նախարար Նարեկ Մկրտչյանը վստահություն հայտնեց, որ այս հուշագիրը գործնական ազդեցություն կունենա բոլոր այն ուղղությունների զարգացման գործում, որոնք փոխհամագործակցության հիմքում են:
.jpg)
ԵՊՀ ռեկտորի պաշտոնակատար Հովհաննես Հովհաննիսյանն ասաց, որ ԵՊՀ-ն շատ է կարևորում գիտական համայնք-պետություն համագործակցությունը, որը պետք է նպաստի երկրի առաջընթացին ու զարգացմանը:
Հանդիպման ընթացքում, որին ներկա էին նաև ԵՊՀ հումանիտար և հասարակագիտական մասնագիտությունների գծով պրոռեկտոր Էլինա Ասրիյանը և նախարարության ներկայացուցիչներ, կողմերը քննարկեցին հուշագիրը կյանքի կոչելու գործնական քայլեր:
ԵՊՀ-ի ու Աշխատանքի և սոցիալական հարցերի նախարարության միջև կնքված հուշագրի համաձայն՝ կողմերը համագործակցելու են նախարարության գործունեության ոլորտների շրջանակում, մասնավորապես՝ զբաղվածության, ժողովրդագրության, սոցիալական պաշտպանության, գենդերային քաղաքականության և կյանքի դժվարին իրավիճակում հայտնված անձանց իրավունքների իրացման ու ծառայությունների հասանելիության ուղղություններով:
Ըստ հուշագրի՝ երկու կառույցների համագործակցության արդյունքում իրականացվելու են ԵՊՀ ուսանողների մասնագիտական պրակտիկա, հետազոտական աշխատանքներ, ուսանողների կարիերայի կառավարում, հոգեսոցիալական ծրագրեր և այլ միջոցառումներ:
