Հոկտեմբերի 21-22-ը Սանկտ Պետերբուրգում տեղի է ունեցել ԱՊՀ երիտասարդական միջխորհրդարանական վեհաժողովի հերթական նիստը, որին մասնակցել են ՀՀ ԱԺ պատգամավորներ Հռիփսիմե Գրիգորյանը, Լիլիթ Մինասյանը և Տրդատ Սարգսյանը: Այդ մասին հայտնում է ԱԺ պաշտոնական կայքը:
Նիստի օրակարգի առանցքում եղել է ՊՀ երկրներում երիտասարդների զբոսաշրջությանը վերաբերող հարցը:
ՀՀ ԱԺ պատգամավոր Հռիփսիմե Գրիգորյանը, անդրադառնալով ադրբեջանական պատվիրակության անդամի՝ Շուշին զբոսաշրջային կենտրոն դարձնելու տեսակետին, նիստի մասնակիցների ուշադրությունն է հրավիրել Ադրբեջանի կողմից 2020 թվականի հոկտեմբերի 8-ին Շուշիի Սուրբ Ամենափրկիչ Ղազանչեցոց եկեղեցու կրկնակի ռմբակոծության, դրա հետևանքով եկեղեցու սրբապատկերների, ինչպես նաև եկեղեցու տարածքում գտնվող արձանների ու խաչքարերի ավերման փաստի վրա: Պատգամավորը շեշտել է, որ չափազանց մտահոգիչ է Ադրբեջանի կողմից եկեղեցու ճարտարապետական տեսքի փոփոխումը, որի միակ նպատակը հուշարձանի՝ հայկական լինելու փաստի կոծկումն է:
Հռիփսիմե Գրիգորյանը ներկայացրել է ՀՀ զբոսաշրջության պետական քաղաքականության հիմնական ուղղությունները, զբոսաշրջային ներուժը: Նա ԱՊՀ անդամ երկրների գործընկերներին հրավիրել է մասնակցելու հաջորդ տարի Հայաստանում անցկացվելիք ՄԱԿ-ի Զբոսաշրջության համաշխարհային կազմակերպության համաժողովին:
Հայաստանի պատվիրակությունը չի մասնակցել ադրբեջանցի պատվիրակին համակարգող ընտրելու հարցի քննարկմանը:
