Պատվաստման ներկայիս տեմպերի պահպանման դեպքում կորոնավիրուսի համավարակը նախատեսվածից երկար կտևի. ԱՀԿ
Աշխարհում պատվաստման ներկայիս տեմպերի պահպանման դեպքում կորոնավիրուսի համավարակը նախատեսվածից ավելի երկար կտևի՝ հայտարարել է Առողջապահության համաշխարհային կազմակերպությունը՝ նշելով, որ համավարակը կարող է շարունակվել 2022 թվականի ընթացքում:
Ըստ ԱՀԿ ղեկավարի խորհրդականի՝ աղքատ երկրները չեն ստանում անհրաժեշտ քանակությամբ պատվաստանյութ. այս պահի դրությամբ Աֆրիկայի բնակչության ընդամենը 5 տոկոսն է պատվաստվել: ԱՀԿ պաշտոնյան նշել է, որ զարգացած երկրները չեն կատարում աղքատ երկրներին դեղամիջոցների մատակարարման իրենց պարտավորությունները։ Կորոնավիրուսից աշխարհում արդեն ավելի քան 4 մլն 900 հազար մարդ է մահացել:
Առողջապահության համաշխարհային կազմակերպությունը վերսկսել է կորոնավիրուսի դեմ ռուսական «Սպուտնիկ V» պատվաստանյութի հաստատման ընթացակարգը: ԱՀԿ մասնագետներն առաջիկայում ստուգումներ իրականացնելու նպատակով կայցելեն Ռուսաստան: Ռուսական կողմը կարծում է, որ պատվաստանյութի հաստատման գործընթացը կավարտվի առաջիկա մի քանի ամսվա ընթացքում:
Ռուսաստանում հոկտեմբերի 30-ից մինչև նոյեմբերի 7-ը ոչ աշխատանքային օրեր են հայտարարվել: Վլադիմիր Պուտինը կառավարության անդամների հետ հանդիպմանը շեշտել է, որ պետք է նվազեցնել համավարակի նոր ալիքի պիկը, և ողջունել է ոչ աշխատանքային օրեր սահմանելու որոշումը:
Իշխանությունը քննարկում է այդ ժամանակահատվածում Մոսկվայում լոքդաուն սահմանելու հնարավորությունը: Երեկ Ռուսաստանում գրանցվել է կորոնավիրուսային հիվանդությունից մահացության հերթական ռեկորդը՝ 1028 դեպք մեկ օրում:
Ռուսաստանում հայտնաբերել են կորոնավիրուսի դելտա շտամի նոր տեսակի եզակի դեպքեր՝ հայտարարել Է «Ռոսպոտրեբնադզորի» համաճարակաբանության կենտրոնական գիտահետազոտական ինստիտուտը:
Գիտնականների կարծիքով՝ նոր տեսակը դելտայի բազմաթիվ ճյուղավորումներից մեկն Է, իսկ լայն ու արագ տեմպով տարածման հավանականությունը Ռուսաստանում և ամբողջ աշխարհում բավականին մեծ Է:
«Ռոսպոտրեբնադզորի» ներկայացուցիչը չի բացառում, որ դելտայի այդ տարատեսակը կարող Է հրահրել հիվանդացության լրացուցիչ վերելք: Նա ընդգծել Է, որ դրա դեմ պայքարին կարող Է օգնել պատվաստանյութը:
