Ներկայումս Հայաստանում գերակշռում է «դելտա» շտամը. ՀՀ առողջապահության նախարար
Այն, որ կորոնավիրուսով վարակվածների թվերն ավելանում են, ակնհայտ է, և վերջերս խստացված հակահամաճարակային միջոցների կիրառման պահանջը հենց այդ թվերի աճի զսպմանն է միտված: Այս պահին հավելյալ հիվանդանոցային մահճակալների ծավալման գործընթաց է ընթանում, և հընթացս պետք է ավելացնենք մեր հզորությունները: Այս մասին ասաց ՀՀ առողջապահության նախարար Անահիտ Ավանեսյանը ԱԺ-ում՝ լրագրողների հետ զրույցում:
Նախարարի խոսքով՝ նկատվում է կորոնավիրուսային հիվանդության երիտասարդացում և ընթացքի ավելի կտրուկ վատթարացում, ինչը, ցավոք, նշանակում է, որ կունենանք հոսպիտալացման ավելի երկար օրեր:
«Արդեն այս պահին 1000-ից ավելի պացիենտներ ունենք, ովքեր օգտվում են հիվանդանոցային-բժշկական օգնությունից: Հիվանդության զարգացման պատկերը շատ ավելի կտրուկ է: Հիվանդության բուժման առումով շեշտակի փոփոխություններ չկան, և ամենագործուն միջոցը մնում է դրա կանխարգելումը»,- ասաց նախարարը:
Ավանեսյանը կարևորեց, որ մինչ ուսումնական տարվա մեկնարկը հնարավորինս մեծ թվով ուսուցիչներ, պրոֆեսորադասախոսական անձնակազմ պատվաստվեն, ինչը կկանխի հիվանդության տարածումը:
«Ներկայումս Հայաստանում շրջանառվող գերակշիռ շտամը «դելտա» շտամն է: Եթե 60 հետազոտությունից 50-ից ավելը «դելտա» շտամն է, դա նշանակում է, որ այն բավական ագրեսիվ շտամ է և ճնշել է մնացած շրջանառվող շտամները: Սիմպտոմների առումով մի փոքր տարբերություն նկատում են մասնագետները: Եթե նախկինում համի-հոտի կորուստը բնորոշիչ էր կորոնավիրուսային վարակին, ապա այս շտամի պարագայում այդքան էլ այդպես չէ: Շատ դեպքերում համի և հոտի զգացողությունը չեն կորցնում: Բացի դրանից՝ այն ավելի հարբուխային սիմպրոմներ ունի»,- տեղեկացրեց նախարարը:
