Հայրենիքի պաշտպանի վերականգնողական կենտրոնի «Ռոբերտ Աբաջյանի» անվան սրահում անցկացվեց շախմատի առաջնություն՝ զինվորների, ՀՀ ԱԺ պատգամավորների, շախմատի ֆեդերացիայի անդամների և ԵՊԲՀ ռեկտորի մասնակցությամբ: Մրցեց 10 զույգ:
Ինչպես նշեց Երևանի շախմատի ֆեդերացիայի նախագահ Մխիթար Հայրապետյանը, արդեն 2 տարի անընդմեջ կազմակերպվում է մի միջոցառում, որի նպատակն է ներգրավելով պատերազմի ժամանակ վիրավորումներ ստացած հերոսներին՝ փոխել նրանց առօրյան, ինչպես նաև բացահայտել տաղանդներին և հասնել հաջողությունների՝ նրանց հետ աշխատելու արդյունքում: «Բոլոր պարտիաններն անցան լարված մթնոլորտում: Ես նույնպես մեծ ջանքերի գնով կարողացա ոչ-ոքի կորզել Եղիշեիից, որը հաղթել էր ինձ նախորդ մրցաշարում»,- ասաց ֆեդերացիայի նախագահը՝ ավելացնելով, որ իրականացվում է շախմատի մասսայականացում՝ այն Հայաստանում ավելի հանրաճանաչ դարձնելու համար:
ԵՊԲՀ ռեկտոր Արմեն Մուրադյանի խոսքով՝ հերոս տղաներն ամբողջական նվիրվել էին իրենց կողմից դրված խնդիրը կատարելուն. ազնիվ պայքար էր գնում մրցակիցների միջև: «Հերոսներին պարտվելը մեծ պատիվ է: Սա արդեն ձևավորված բարի ավանդույթ է, որն ուշադրության կենտրոնում է պահում բուժում ստացող զինվորներին»,- ընդգծեց բուհի ղեկավարը:
Ներկաները պատրաստակամություն հայտնեցին զինվորների մասնակցությամբ մրցաշարերը դարձնել ավելի հաճախակի:
