Համացանցում հայտնված տեղեկատվության վերաբերյալ ԱՆ-ն պաշտոնապես հայտնում է, որ Աբովյանի «Դատաբժշկական գիտագործնական կենտրոնի» մասնաճյուղում փորձաքննված և նույնականացված մի քանի մասունքներ ու դիակներ, որոնք ժամանակավորապես պահվել են կենտրոնի ջերմամեկուսիչ պատերով նկուղային հարկում, հարազատները այլ վայր տեղափոխելու ցանկություն են հայտնել:
Չնայած այն հանգամանքին, որ մասունքների տեղաշարժը նպատակահարմար չէ, և դրանց պահման ներկա պայմանները համապատասխանում են մասնագիտական պահանջներին, այնուամենայնիվ, որոշել ենք ընդառաջել ծնողների ցանկությանն ու տեղափոխել այլ դատաբժշկական կենտրոնի սառնարանային հատված` զերծ պահելով հարազատներին լրացուցիչ ցնցումներից:
Եվս մեկ անգամ նշում ենք, որ մասունքներն անցել են համապատասխան նույնականացում և սպասում են, որ հարազատները վերցնեն հուղարկավորելու համար: ԱՆ կողմից կկազմվի աշխատանքային խումբ, որը կուսումնասիրի Աբովյանի «Դատաբժշկական գիտագործնական կենտրոնի» աշխատանքների կազմակերպման հետ կապված հարցերը քննելու համար՝ հայտնում են ՀՀ առողջապահության նախարարությունից:
Ավելի վաղ հայտնել էինք՝ անհետ կորած և զոհված զինծառայողների ծնողներն այսօր փակել էին Հերացի փողոցը՝ պնդելով, որ զոհված զինծառայողների աճյունների թվերում անճշտություններ կան:
Նրանք պահանջում էին հանձնաժողով ստեղծել, որը կզբաղվի հստակ հաշվառումով և վերջնական թիվ կներկայացնի:
