Տեղի է ունեցել «Կայուն օրգանական աղտոտիչների մասին» Ստոկհոլմի կոնվենցիայի շրջանակներում իրականացված «Օզոնային շերտը քայքայող նյութերի և կայուն օրգանական աղտոտիչների հեռացման համակարգված կառավարման տարածաշրջանային ցուցադրական ծրագրի» եզրափակիչ աշխատաժողովը։
Ծրագիրն իրականացվել է համատեղ Շրջակա միջավայրի նախարարության և ՄԱԿ-ի արդյունաբերական զարգացման կազմակերպության կողմից, Գլոբալ էկոլոգիական հիմնադրամի ֆինանսավորմամբ: Հայաստանի Հանրապետությունը ծրագրին մասնակցել է միայն Ստոկհոլմի կոնվենցիայի կարգավորման տակ գտնվող պոլիքլորացված բիֆենիլների (ՊՔԲ-ների) մասով։
Հայաստանի Հանրապետությունը 2003 թվականի հոկտեմբերի 22-ին վավերացրել է Ստոկհոլմի կոնվենցիան, որով ստանձնել է մի շարք իրավական, վարչական և բնապահպանական պարտավորություններ։ Կայուն օրգանական աղտոտիչների հիմնախնդիրը ներկայումս խիստ արդիական է, քանի որ դրանք տոքսիկանտներ են, որոնք քիմիական վտանգ են ներկայացնում մարդու առողջության, շրջակա միջավայրի և կենսաբանական ամբողջականության համար:
Դրանց մեծամասնությունն օժտված են բարձր թունունակությամբ և պատճառ են հանդիսանում մի շարք լուրջ հիվանդությունների: Կայուն օրգանական աղտոտիչները տարածվում են օդային և ջրային զանգվածների միջոցով մեծ հեռավորությունների վրա, ընդգրկվում են սննդային շղթաների մեջ և կուտակվում մարդու ու կենդանիների օրգանիզմներում:
Ծրագրի ընթացքում հաշվառվել, հայտնաբերվել, մակնշվել և անալիզի է ենթարկվել պոլիքլորացված բիֆենիլներ պարունակող յուղերի 2000 նմուշ՝ դրանց հետագա վնասազերծման կամ ոչնչացման եղանակը որոշելու նպատակով։
Աշխատաժողովին մասնակցել են բնապահպանության և ընդերքի, առողջապահական և աշխատանքի, քաղաքաշինության, տեխնիկական և հրդեհային անվտանգության տեսչական մարմինների և շահագրգիռ գերատեսչությունների ներկայացուցիչներ, ինչպես նաև էներգետիկ համակարգի «Հայաստանի էլեկտրական ցանցեր» ՓԲԸ-ի, «Գազպրոմ Արմենիա» ՓԲԸ-ի, «Գազպրոմ Արմենիա» ՓԲԸ-ի, «Հրազդան-5», «Երևանի ջերմաէլեկտրակենտրոն» ՓԲԸ-ի, «Հրազդանի ջերմաէլեկտրակայան» ԲԲԸ-ի, «Բարձրավոլտ էլեկտրացանցեր» ՓԲԸ-ի, «Միջազգային էներգետիկ կորպորացիա» ՓԲԸ-ի կազմակերպությունների ներկայացուցիչները։
Բացման խոսքով հանդես է եկել Շրջակա միջավայրի նախարարի տեղակալ Ա․ Մազմանյանը։ Հաշվի առնելով այն հանգամանքը, որ յուղերը հիմնականում գտնվում են շահագործվող սարքավորումներում, մեր երկրի համար արդիական է ՊՔԲ-ներից այդ յուղերի էկոլոգիապես անվտանգ վնասազերծումը համապատասխան մասնագիտացված սարքավորման միջոցով՝ դրանց հետագա երկրորդային օգտագործման համար:
Կոնվենցիայի կողմ երկրները կարող են Գլոբալ էկոլոգիական հիմնադրամի աջակցությամբ ձեռք բերել յուղերի վնասազերծման սարքավորում։
