Ընդունելության քննություններն անցկացվելու են «մեկ մասնագիտություն, մեկ բուհ» սկզբունքով
Այս տարի հաստատված նոր կարգի համաձայն՝ բուհերում ընդունելությունը կանցկացվի «մեկ մասնագիտություն, մեկ բուհ» սկզբունքով, ինչը, մասնագետների կարծիքով, կնպաստի, որ չտուժի մասնագիտական կողմնորոշումը: Նախորդ տարիների փորձը վկայում է, որ հաճախ բարձր միավորներով ընդունված, բայց մասնագիտության հարցում չկողմնորոշվածները դուրս էին թողնում մյուսներին նրանց նախընտրած մասնագիտությունից:
«Մեկ մասնագիտություն, մեկ բուհ» սկզբունքը ենթադրում է, որ դիմորդն իր նախընտրած մասնագիտությունը կհայտագրի մեկ բուհում՝ անվճար ու վճարովի բաժիններում: Հիմնական մրցույթից հետո թափուր տեղերի դեպքում կարող են հայտագրել ևս 6 մասնագիտություն՝ նույն քննություններով, որոնք առաջին անգամ հայտագրել են:
Հայտագրումը կսկսվի ապրիլի 15-ից և կանցկացվի 2 փուլով. այն կկատարվի նույն՝ dimord.am կայքում՝ բացառապես առցանց ձևաչափով. առաջին փուլը կտևի մինչև մայիսի 10-ը, 2-րդը՝ հունիսի 26-ից հուլիսի 1-ը: Դժվարությունների դեպում դիմորդը կարող է դպրոցի օգնությամբ լրացնել հայտերը:
Դիմորդները քննությունները կհանձնեն հունիսին. ընդունելության հիմնական փուլից հետո, ըստ թափուր մնացած տեղերի, կսկսվի երկրորդի հայտագրումը ՝ դրական միավորներով մրցույթից դուրս մնացած դիմորդների համար: Առաջին և երկրորդ փուլերից հետո՝ հուլիսի 18-ին կսկսվի լրացուցիչ թափուր տեղերի համար հայտագրումը: Մրցույթի վերջնական արդյունքները կհրապարակվեն հուլիսի 30-ին: Նախորդ տարիների փորձից ելնելով՝ Կարո Նասիբյանը փաստում է, որ բուհեր դիմում է շրջանավարտների ընդհանուր թվի կեսը, ըստ այդմ՝ այս տարի էլ կունենանք 13-14 հազար դիմորդ:
