Հրշեջները մարել են Երևանի Րաֆֆու փողոցի հրուշակեղենի պահեստում բռնկված հրդեհը. այրվել է մոտ 200 խմ հրուշակեղեն՝ տեղեկացնում է ՀՀ ԱԻՆ-ը:
«Մարտի 21-ին, ժամը 15։31-ին «ՍՕՍ Գեոռիթմ» հակահրդեհային ազդարարման համակարգով ահազանգ է ստացվել Ճգնաժամային կառավարման ազգային կենտրոն՝ Երևանի Րաֆֆու 111 հասցեում գտնվող «Յաշկինո» հրուշակեղենի ներմուծման պահեստից։
Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ, Ճգնաժամային կառավարման ազգային կենտրոնի օպերատիվ խումբը, Հրդեհաշիջման և փրկարարական աշխատանքների կազմակերպման բաժնի հերթապահ խումբը։
Հայտարարվել է հրդեհի բարդության «1 ԲԻՍ» կանչ։ Պարզվել է, որ հրդեհ է բռնկվել «Յաշկինո» հրուշակեղենի ներմուծման պահեստում՝ մոտ 600 քմ տարածքում։
Հրդեհը մեկուսացվել է ժամը 17։58-ին, մարվել՝ 18։08-ին։ Այրվել է մոտ 200 խմ հրուշակեղեն»,- հայտնում է ԱԻՆ-ը։
