Խոսքերը, որ վերագրվում են ինձ, ես չեմ ասել. այսօր լրագրողների հետ ճեպազրույցում հայտարարեց ԱԺ «Իմ քայլը» խմբակցության պատգամավոր Անուշ Բեղլոյանը՝ անդրադառնալով Եվրամիության, Վրաստանի, Թուրքիայի, Ադրբեջանի և Հայաստանի ներկայացուցիչների մասնակցությամբ տեսակոնֆերանսի ընթացքում հասարակական հնչեղություն ստացած հայտարարություններին:
«Իմ խոսքերը խեղաթյուրվել են, ինձ վերագրվել են արտահայտություններ, որոնք անհնար է, որ ես ասեի: Կոնտեքստից կտրված արտահայտության վրա հնարվել են հայտարարություններ»,- շեշտեց պատգամավորը:
«Միակ նախադասությունը, որի վրա կառուցվել է այդ ամբողջ սուտը, եղել է ի պատասխան թուրք ներկայացուցչի պնդման, թե Արցախում վերականգնվել է պատմական արդարությունը: Ես պատասխանել եմ, որ հայերից ավելի լավ պատմական մեջբերումներ անել որևէ մեկը չի կարող՝ ի նկատի ունենալով, որ 30 տարի Ադրբեջանը փորձում է հիմնավորել Արցախի պատմական կարգավիճակը՝ հնարելով պատմություն, բայց մենք դրա մեջ ավելի լավ ենք, և մեր անտիկ մեջբերումներն ապացուցում են հակառակը»,- նշեց Բեղլոյանը:
Պատգամավորը տեղեկացրեց, որ ինքը տեսակոնֆերանսին խոսել է անհապաղ հայ գերիների վերադարձի մասին: Իսկ Արցախի կարգավիճակի մասին հարցին էլ տեսակոնֆերանսի ժամանակ Բեղլոյանը պատասխանել է, թե այն պետք է քննարկվի ոչ թե այդ սեմինարի ընթացքում, այլ բացառապես ԵԱՀԿ Մինսկի խմբի համանախագահների հովանու ներքո երկրների ղեկավարների միջև:
Թեման արծարծած աղբյուրների և այն տարածած ադրբեջանական լրատվամիջոցների մասին Բեղլոյանը նշեց. «Երևի ադրբեջանական մամուլն ու որոշ խեղաթյուրող անձինք աշխատում են իրար հետ»:
