Կառավարության այսօրվա նիստին փոխվարչապետ Տիգրան Ավինյանը նիստը մեկնարկեց գերիների փոխանակման մասին տեղեկատվության հաղորդմամբ: Ավինյանը նշեց, որ այս շաբաթ տեղի է ունեցել գերիների փոխանակման առաջին փուլը, բայց շարունակական աշխատանքներ են տեղի ունենում գերիների տվյալների ճշտման և հետագա փոխանակման համար, որի ուղղությումբ էլ բանակցություններ են ընթանում Ադրբեջանի հետ՝ Կարմիր խաչի և ռուսական կողմի ներգրավվածությամբ:
«Երկրորդ խնդիրը վերաբերում է Խծաբերդում տեղի ունեցած միջադեպին, նաև այն անձանց հետ կապված, որոնք ամենայն հավանականությամբ գերեվարված են: Տվյալներն այս պահին ճշտվում են: ԳՇ պետ Օնիկ Գասպարյանն այս պահին Արցախում է՝ այս և այլ հարցերի կապակցությամբ տեղում լուծումները հասկանալու և քննարկումներ իրականացնելու: Այս հարցի շուրջ էլ տեղի են ունենում քննարկումներ ադրբեջանական կողմի հետ»,- նշեց Ավինյանը:
Հին Շենի մասով Ավինյանը նշեց, որ որոշակի լարվածություն եղել է նաև այս համայնքում, այս պահին միջդիրքային հաղորդակցությունն առկա է, խնդիրը դեռ ամբողջությամբ հանգուցալուծված չէ, բայց այդ հատվածում նաև խաղաղապահ զորքերն են տեղակայված, և մոտ ժամանակներս ակնկալվում է վերջնական հանգուցալուծում:
Ավինյանը հայտնեց նաև, որ պաշտպանության նախարար Վաղարշակ Հարությունյանն էլ այս պահին Սյունիքում է: Նա նշեց, որ սահմանապահ զորքերը Սյունիքի սահմանների երկայնքով իրականացնում են տեղակայման աշխատանքներ:
