ԱԺ «Իմ քայլը» խմբակցության պատգամավոր Տաթևիկ Հայրապետյանը խորհրդարանում մի շարք արձանագրումներ արեց պատերազմի և Արցախի խնդրի թեմայով:
«Հայաստանում չի եղել որևէ իշխանություն, որը չխոսի և չձգտի խնդրի փոխզիջումային լուծման: Մենք երբ փնտրում ենք մեղավորներ մեր մեջ, բնականաբար, ստեղծված իրավիճակում յուրաքանչյուրս մեղքի իր բաժինը ունի, այդ թվում՝ ես: Կարող եմ հստակ ասել, որ Բաքուն երբեք չի ձգտել խաղաղության, այլ խոսել է սպառնալիքի, թշնամանքի լեզվով տարիներ շարունակ: Եվ ունեցել է տարածքային նկրտումներ ոչ միայն Արցախի, այլև ՀՀ պետական սահմանների, ընդհուպ մինչև մայրաքաղաք Երևանի նկատմամբ: Սա երբեք չի եղել տարածքային վեճ, սա եղել է Ադրբեջանի կողմից տարվող բնաջնջման քաղաքականության շրջանակներում իրականացվող քաղաքականություն»,- նշեց Հայրապետյանը:
Պատգամավորի խոսքով՝ տարածաշրջանում ստեղծված բավականին բարդ իրավիճակում, ուժերի նման անհամաչափության պայմաններում մենք իսկապես անհաջողություն ենք կրել ու հայտնվել բարդ իրավիճակում: Հիմա էլ որպես ժողովուրդ անցնում ենք բավականին բարդ փորձության միջով:
«Այս շրջանում մեր հնչող խոսքը, մեր արած գործողությունները պայմանավորվում են, թե հետագայում մենք արդյոք կգրանցե՞նք հաջողություններ, թե՞ կշարունակվենք «տապակվել» մեր անհաջողության մեջ: Մենք չենք բնաջնջվել, չենք վերացել, կանք և ապրում ենք մեր անմահացած և կենդանի հերոսների բացառիկ նվիրումի շնորհիվ»,-նշեց պատգամավորը:
