Գերագույն խորհրդի և Ազգային ժողովի նախկին պատգամավոր Հրանտ Խաչատրյանը խորհրդարանում լսումների ժամանակ իր ելույթում անդրադարձավ մի քանի խնդրի և 2 առաջարկ ներկայացրեց:
«Մենք եկել ենք քննարկելու փաստաթուղթ, որը ԱԺ խմբակցության կողմից է առաջադրված և առ ոչինչ է: Ոչնչով չի տարբերվում գործադիր իշխանության ղեկավարի ստորագրած փաստաթղթից: Ինչո՞ւ. որովհետև այստեղ չի գրված, որ ԱԺ-ն՝ հանձին հայ ժողովրդի, մերժում է միջազգային իրավունքի նորմերին հակասող այդ փաստաթղթի բովանդակությունը»,- նշեց Խաչատրյանը՝ հավելելով, որ փողոցի ելույթները ոչնչով չեն տարբերվում ԱԺ ամբիոնից հնչող ելույթներից:
«Ասում եք՝ նոր ղեկավար, նոր արդյունքներ՝ հայանպաստ արդյունքներ: Քանի անգամ ենք լսել այս ամբիոնից հայանպաստ արդյունքներ, ո՞վ է ասել այստեղից, ո՞րն է հայանպաստը»,- հարց ուղղեց ընդդիմադիրներին Խաչատրյանը:
Նախկին պատգամավորը նշեց, որ հիմա «բոլորը գտել են հարմար դավաճան, որի վրա կարող են բարդել բոլոր մեղքերը»: «Ասում են՝ խաբել է մեզ. խաբողը սրիկա է, խաբվողը՝ հիմար, մենք պետք է ընտրենք, թե այդ երկուսից որ դասակարգման մեջ ենք: Ինձ ոչ ոք չի խաբել»,- ասաց նա:
«Երկու առաջարկ ունեմ: Իշխանության եկող որևէ ուժ չի կարող ընդունել նույնպիսի մի խայտառակ փաստաթուղթ, որի բեռի տակ 100 տարի ճռռում ենք ամբողջ ազգով: Խոսքը Մոսկվայի պայմանագրի, Կարսի պայմանագրի մասին է և դրա շարունակության: ԱԺ-ն առաջին հերթին պետք է մերժի այդ փաստաթղթի բովանդակությունը: Երկրորդ՝ խոսում ենք Արցախի կարգավիճակի մասին: 30 տարի առաջ դավադրություն է տեղի ունեցել հայ ժողովրդի ազգային շահերի նկատմամբ: 30 տարի առաջ Հայաստանին վերամիավորված Արցախն անջատվել ու անկախացել է Հայաստանից: Կարճ կասեմ՝ դա մի բան է նշանակում. Հայաստանի իշխանությունները միջազգային իրավունքի վերմակը քաշել են իրենց վրա և Արցախին դուրս թողել»,- նշեց Խաչատրյանը:
Պատերազմը դավադիր էր՝ նշեց Խաչատրյանը՝ հավելելով, որ ՀՀ ԱԺ-ն պարտավոր է քննարկել և որոշել Արցախի կարգավիճակը ինքնուրույն՝ առանց որևէ մեկին խնդրելու կամ դիմելու:
