Դատապարտյալներին օգտակար զբաղվածությամբ ապահովելը համարելով վերասոցիալականացման կարևոր բաղադրիչ՝ «Արմավիր» և «Նուբարաշեն» քրեակատարողական հիմնարկներում մեկնարկել ենք դատապարտյալների համար նախատեսված խոհարարական, իսկ «Վանաձոր» քրեակատարողական հիմնարկում՝ հացաթխման դասընթացներ: Այդ մասին Ֆեյսբուքի էջում գրել է արդարադատության նախարար Ռուստամ Բադասյանը:
«Արմավիր» և «Նուբարաշեն» ՔԿՀ-ներում դատապարտյալներին խոհարարական հմտություններ է դասավանդում 4 խոհարար՝ ըստ մասնագիտացումների (խմորային աշխատանք, խավարտներ, աղցաններ և մսային աշխատանք): Խոհարարական դասընթացին մասնակցում է շուրջ 25 դատապարտյալ: Իսկ «Վանաձոր» քրեակատարողական հիմնարկում հացաթխման դասընթացներն իրականացվում է տեխնոլոգի կողմից: Այս դասընթացին մասնակցում է 5 դատապարտյալ:
Դասընթացը հաջող ավարտած մասնակիցները կկարողանան աշխատանք գտնել թե՛ պատժի կրման ընթացքում, թե՛ պատժի կրումից ազատվելուց հետո․ դասընթացը հաջողությամբ ավարտողները կստանան վկայականներ:
Շատ եմ կարևորում այն փաստը, որ դասընթացներում ներգրավվել են և՛ որոշակի ժամկետով, և՛ ցմահ ազատազրկման դատապարտված անձինք՝ հիմքում ունենալով դատապարտյալների նկատմամբ հավասար վերաբերմունքի ցուցաբերման և ամրապնդման գաղափարը:
Դասընթացների իրականացման գաղափարը կյանքի է կոչվել «Դի-Վի-Վի Ինթերնեյշնալի» հայաստանյան գրասենյակի, «Խաչմերուկ» կրթական խորհրդատվական կենտրոն հիմնադրամի, «Աջակցություն դատապարտյալին» հիմնադրամի, «Ռեդի-Սթեդի» ՍՊԸ-ի և Արդարադատության նախարարության սերտ համագործակցության արդյունքում»,- գրել է նախարարը:
