Խորհրդարանը երկրորդ ընթերցմամբ քննարկեց «Տեսալսողական մեդիայի մասին» և «Լիցենզավորման մասին» օրենքում փոփոխություններ կատարելու մասին օրենքների նախագծերի փաթեթը:
Նախագծի համահեղինակ Վահագն Թևոսյանը ներկայացրեց առաջինից երկրորդ ընթերցման ժամանակահատվածում փաթեթում կատարված փոփոխությունները:
Ըստ այդմ՝ փաթեթում ներառվել է «կարևոր իրադարձություն» հասկացությունը, որն ըստ պատգամավորի՝ եվրոպական օրենսդրությունից վերցված իրողություն է, ենթադրում է պետական կամ համազգային նշանակության քաղաքական, մշակութային, կրոնական, սպորտային իրադարձություններ:
Երկրորդ փոփոխությունն այն է, որ մրցութային փաստաթղթերում ներառվել են էթիկայի կանոնագիրը և ինքնակարգավորման մեխանիզմը, որն ազատում է ԶԼՄ-ներին կարգավորող մարմնի կողմից որևէ բովանդակային գնահատական տալու պարտավորությունից:
Հաջորդ փոփոխությունը ազգային փոքրամասնություններին հատկացվող եթերաժամանակի ֆիքսումն է՝ հեռուստաեթերով՝ 30 րոպե շաբաթական և ռադիոյով՝ 2 ժամ:
Մյուս փոփոխությունն, ըստ պատգամավորի, հանրային մուլտիպլեքսում առկա հեռուստաալիքները պետք է անվճար տրամադրեն իրենց ծրագրերը ցանցային օպերատորներին, և վերջիններս դրանք պետք է սփռեն: «Սա ենթադրում է, որ հանրային մուլտիպլեքում եղած բոլոր հեռուստաալիքները հունվարի 1-ից հետո բոլոր ցանցային օպերատորներով հասանելի են լինելու հանրությանը»,- նշեց Թևոսյանը:
Եվ վերջին կարևոր փոփոխությունը, նախագծի հեղինակի խոսքով, այն է, որ ընտրությունների կամ հանրաքվեների լռության օրը հնչած քարոզչության համար հեռարձակողը պատասխանատվության չի ենթարկվում, եթե ուղիղ եթերում զգուշացվել է քարոզչության հեղինակին խախտման մասին:
