ՀՀ ՏԿԵ նախարար Դավիթ Խուդաթյանն այսօր այցելել է նաև Տավուշի մարզ։ Այս մասին տեղեկացնում են նախարարությունից։
Մարզպետ Հայկ Ղալումյանի հետ նախարարը նախ եղել է Ենոքավան-Կարմիր գյուղ-Ջուջևան ավտոճանապարհի շինհրապարակում։ Տեղում ծանոթացել են իրականացվող աշխատանքների ընթացքին, քննարկել շինարարական գործընթացին առնչվող հարցերը։ Անդրադարձ է կատարվել նաև աշխատանքների արդյունավետ կազմակերպմանն ու սահմանված ժամկետներում իրականացմանը։
Այնուհետև նախարարը այցելել է Իջևան համայնքի Խաշթառակ բնակավայր, որտեղ սուբվենցիոն ծրագրով տուֆ քարով սալարկվում է դեպի Խաշթառակի եկեղեցի տանող ճանապարհը։
Ծրագրի արժեքը շուրջ 283 մլն դրամ է։
Իջևան քաղաքում նախարարն այցելել է նաև բազմաբնակարան բնակելի շենքերի էներգաարդյունավետ արդիականացման ծրագրի իրականացման վայր։
Բնակիչները գոհունակություն են հայտնել կատարված աշխատանքների համար՝ նշելով, որ շենքերի էներգաարդյունավետ արդիականացման արդյունքում իրենց ծախսերը կրճատվել են գրեթե 40 տոկոսով, բնակարաններն ավելի տաք են դարձել, իսկ շենքերի արտաքին տեսքը բարեկարգվել է։
