ԱՄՆ նախագահը մեկնաբանել է ռուս-ուկրաինական կարգավորումը: Դոնալդ Թրամփը հույս է հայտնել, որ Մոսկվան կգնա գործարքի և Վաշինգտոնը ստիպված չի լինի լրացուցիչ մաքսատուրքեր սահմանել ռուսական «ամբողջ նավթի համար»։
Նա նաև տեղեկացրել է, որ Կիևի հետ հազվագյուտ մետաղների մասին գործարքը պատրաստ է, սակայն ուկրաինական կողմը ձգձգում է դրա ստորագրումը և անվտանգության նոր պայմաններ առաջ քաշում: Թրամփը հավելել է, որ այդ գործարքի շրջանակում ՆԱՏՕ-ին Ուկրաինայի անդամակցության հարցը չի դիտարկվում:
Դոնալդ Թրամփը տքնաջան աշխատանք է կատարում Ռուսաստանի և Ուկրաինայի միջև խաղաղության պայմանագրի ուղղությամբ՝ հայտարարել է Սպիտակ տան խոսնակ Քերոլայն Լևիթը, շեշտել՝ ԱՄՆ նախագահը դժգոհ է երկու երկրի առաջնորդների հայտարարություններից:
Պետքարտուղարության խոսնակն էլ անդրադարձել է Վլադիմիր Պուտինի առաջարկին, որ Ուկրաինայում կարող է ՄԱԿ գլխավորությամբ ժամանակավոր վարչակազմ ստեղծվել: Թեմմի Բրյուսը նշել է, որ Դոնալդ Թրամփը հավանություն չի տալիս Մոսկվայի գաղափարին:
«Ուկրաինայում սահմանադրական ժողովրդավարություն է, այդ երկրի կառավարման գործընթացը որոշվում է սահմանադրությամբ և ուկրաինացի ժողովրդի կամքով», - ասել է պետքարտուղարության խոսնակը։ Նա ընդգծել է՝ բանակցություններում Ռուսաստանից և Ուկրաինայից կպահանջեն կոշտ որոշումներ և փոխզիջումներ:
Հրադադարի գործարքի մասին քննարկումների ֆոնին ուկրաինական ԶԼՄ-ները գրում են, որ այսօր 2025 թվականի ընթացքում առաջին անգամ ռուսական ուժերը զանգվածային հարվածներ չեն հասցրել Ուկրաինայի տարածքին: Այնուհանդերձ մի շարք բնակավայրերում պայթյուններ են լսվել, Սումիում մեկ մարդ է տուժել:
