Մադրիդում Եվրոպայի արտգործնախարարների՝ Ուկրաինայի հարցով հանդիպման ժամանակ եվրոպացի դիվանագետները Ռուսաստանին կոչ են արել համաձայնության գալ Ուկրաինայում հրադադարի շուրջ: Նախարարներն առաջարկել են Ուկրաինայում հրադադարի շուրջ բանակցությունների ավարտի վերջնական ժամկետ սահմանել, հանդիպումից հետո լրագրողներին ասել է Լեհաստանի արտգործնախարար Ռադոսլավ Սիկորսկին։
«Ռուսաստանն արդեն որոշակի խոստումներ է ստացել ամերիկյան կողմից, Ուկրաինան ընդունել է անվերապահ զինադադարի առաջարկները, մենք չենք կարող հավերժ սպասել»,- հավելել է նա։
Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը Միացյալ Նահանգներին կոչ է արել ճնշում գործադրել Կրեմլի վրա՝ վերջ դնելու արյունալի եռամյա հակամարտությանը։ Իսպանիայի արտաքին գործերի նախարար Խոսե Մանուել Ալբարեսը հայտարարել է, որ իր կառավարությունը ձգտում է օգտագործել Եվրոպայում սառեցված ռուսական ակտիվները՝ Ուկրաինային օգնություն տրամադրելու համար:
Ֆրանսիայի արտաքին գործերի նախարար Ժան-Նոել Բարրոն էլ հայտարարել է, որ Ռուսաստանը պարտավոր է հստակ պատասխան տալ ԱՄՆ-ին, թե արդյոք իրապես ցանկանում է խաղաղության հասնել: Նա ընդգծել է, որ մի քանի շաբաթ առաջ Ուկրաինան համաձայնել է անվերապահ զինադադարի, մինչդեռ Ռուսաստանը շարունակում է ռազմական հանցագործությունները:
Միջազգային նորությունները՝ Մերի Ներսիսյանի ռեպորտաժում։
