Վերջին շաբաթների ընթացքում առաջընթաց է գրանցվել, որը տպավորիչ է: Երկու երկրներին շնորհավորում եմ համաձայնության համար: Այդ մասին ՀՀ նախագահ Վահագն Խաչատուրյանի հետ համատեղ ասուլիսի ժամանակ հայտարարեց Գերմանիայի նախագահ Ֆրանկ-Վալտեր Շտայնմայերը՝ անդրադառնալով Հայաստանի և Ադրբեջանի միջև խաղաղության պայմանագրի կնքման գործընթացին:
«Արդեն համաձայնեցված կա փաստաթուղթ, որը քաղաքական ղեկավարների աշխատանքի արդյունքն է, որը կարող է ճանապարհ բացել այս տարածաշրջանում երկարատև խաղաղության համար, բայց դեռևս չենք հասել վերջնակետին, և դրա համար էլ ասում եմ, որ ցանկալի է, որ երկու կողմերը օգտագործեն այս պատեհ ժամը, որ երկարաժամկետ և կայուն խաղաղություն հաստատվի Հարավային Կովկասում: Դա նշանակում է նաև, որ մենք պետք է սպասենք, որ այս պայմանագիրը ժամանակին և շուտափույթ ստորագրվի, վավերացվի և իրագործվի:
Մենք Բաքվում մեր մյուս գործընկերների հետ հանդիպման ժամանակ խոսելու ենք այս մասին»,- նշեց նա:
«Վկա ենք, որ Հայաստանը վերջին շաբաթների ընթացքում շատ կառուցողական է: Երբ մեր այցն էր նախապատրաստվում, դեռևս կային բաց հարցեր, և այժմ դրանք չկան»,- ասաց Շտայնմայերը:
«Խաղաղության համաձայնագրին այժմ այլևս ոչինչ չի խանգարում, որ ստորագրվի, վավերացվի, իրագործվի: Այդ առումով Հայաստանը որոշումներ է կայացրել, որոնք հանգեցրել են խաղաղության համաձայնագիրը հնարավոր դառնալուն, և Ադրբեջանի կողմում պետք է բոլոր հնարավոր թերահավատությունները վերացնել: Մարդիկ այս տարածաշրջանում սպասում են, որ երկարամյա հակամարտությունից հետո այն դադարի, և տնտեսական զարգացումներն էլ կախված կլինեն քաղաքական կայունությունից: Այդ առումով շատ լավ հիմքեր կան:
Կարող ենք ասել, որ Հայաստանի համար հեշտ չի եղել ավարտել և հանգուցալուծման հասցնել, շատ երկրներ կարող են օրինակ վերցնել այսպիսի գործընթացից»,- ասաց նա:
«Մենք հետևողական ենք մենք աշխատանքում խաղաղության համաձայնագրի ստորագրման հետ կապված: Մենք ունենք խնդիր խաղաղություն հաստատել տարածաշրջանում և կոնկրետ Ադրբեջանի հետ, և այդ նպատակին հասնելու համար կոնկրետ աշխատանքներ ենք մենք անում: Այն դժվարությունները, որոնք կան և կլինեն, մենք գտնում ենք, որ դրանք հաղթահարելի են, և ցանկացած հարց կարելի է բանակցային սեղանի շուրջ լուծել: Պատերազմի ժամանակն ավարտվել է, հակամարտության ժամանակն ավարտվել է: Հարավային Կովկասը այլևս այդ ռեսուրսները չունի նոր պատերազմի»,- ասաց Վահագն Խաչատուրյանը:
