Փարիզում Վոլոդիմիր Զելենսկու մասնակցությամբ տեղի է ունեցել եվրոպացի առաջնորդների հանդիպումը: Օրակարգում են Ուկրաինայի անվտանգության ամրապնդման հարցը և Ռուսաստան-Ուկրաինա հնարավոր խաղաղության գործարքում Եվրոպայի դերը։ Գագաթնաժողովին ընդառաջ Էմանուել Մակրոնը հեռախոսազրույց է ունեցել Դոնալդ Թրամփի հետ։
Եվրոպացի առաջնորդների հանդիպումից հետո Մակրոնը հայտնել է, որ բրիտանական և ֆրանսիական ռազմական պատվիրակություններ կայցելեն Ուկրաինա՝ երկրի զինված ուժերի ապագա ձևաչափը մշակելու համար: Նաև առաջարկներ կմշակվեն՝ մշտադիտարկելու հնարավոր հրադադարի ռեժիմը:
Չնայած խաղաղության և հրադադարի մասին խոսակցություններին՝ Ուկրաինան և Ռուսաստանը կրկին հայտարարել են փոխադարձ հարվածների մասին: Ռուսական կողմի տվյալով՝ ուկրաինական ուժերը թիրախավորել են Դաշնության էներգետիկ ենթակառուցվածքը: Ռուսաստանի զինված ուժերն էլ հարվածել են Խարկովին և Դնեպրին: Վնասվել են քաղաքացիական օբյեկտներ, հայտնի է վիրավորների և զոհերի մասին:
