Արբանյակը փամփուշտի արձակումը չի կարող արձանագրել: Այդ մասին լրագրողների հետ ճեպազրույցում նշեց ԲՏԱ նախարար Մխիթար Հայրապետյանը՝ արձագանքելով այն հարցին, թե ինչու հայկական արբանյակի տեղեկությունները չեն ներկայացվում՝ ապացուցելու համար, որ հայկական կողմից Ադրբեջանի հետ սահմանին կրակոցներ չեն լինում:
«Մասնագիտական առումով համարում եմ անհնարին, այսինքն՝ փամփուշտի պատճառած վնասը արբանյակային հեռավար կառավարմամբ դիտարկման տեսալուսանկարահանող արբանյակների կողմից չի կարող արձանագրվել»,- ասաց նա:
Նախարարը նշեց, որ շարժումը կարող է արձանագրվել, բայց նա այդ մասին տեղեկություն չունի:
Մխիթար Հայրապետյանը նաև նշեց, որ Հայաստանն այդ հարցում ապացուցելու ոչինչ չունի: «Եթե դու որևէ բան չես արել, դու ի՞նչ պետք է ապացուցես որևէ մեկին: Այս իմաստով մենք սպասում ենք Ադրբեջանի կողմից համապատասխան ապացույցներ: Եթե այդպիսիք առկա կլինեն, բնականաբար, համապատասխանաբար գործողություններ կիրականացվեն մեր կողմից»,- ասաց նա:
Հիշեցնենք, որ Ադրբեջանի ՊՆ-ն արդեն 6-րդ օրն է՝ ինչ ապատեղեկություն է տարածում ՀՀ-ի կողմից իբր կրակոցների մասին:
Հայաստանի Հանրապետության վարչապետի աշխատակազմն առաջարկել է հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին մինչև օրս Ադրբեջանը չի արձագանքել։
Հայաստանի Հանրապետության պաշտպանության նախարարությունը վերահաստատում է, որ ՀՀ վարչապետի աշխատակազմի դիրքորոշմանը համապատասխան՝ պատրաստ է հետաքննել Ադրբեջանի ՊՆ հաղորդագրությունը հիմնավորող փաստերը՝ դրանք ՀՀ-ին փոխանցելու պարագայում։
Այս պահի դրությամբ Ադրբեջանի Հանրապետությունը Հայաստանի Հանրապետությանը չի փոխանցել ՀՀ ԶՈՒ ստորաբաժանումների կողմից հրադադարի ռեժիմի խախտման ոչ մի փաստական տվյալ կամ հիմնավորում։
