ԱՄՆ նախագահ Դոնալդ Թրամփը մտադիր է մոտ ժամանակներս մաքսատուրքեր սահմանել Եվրամիությունից ներկրվող ապրանքների համար։ «Ես ժամանակացույց չունեմ, բայց դա տեղի կունենա շատ շուտով»,- կիրակի՝ փետրվարի 2-ին, ասել է Սպիտակ տան ղեկավարը։
Թրամփի խոսքով՝ ԵՄ-ի հետ հարաբերություններում Միացյալ Նահանգների առևտրային դեֆիցիտը հասել է 300 միլիարդ դոլարի: Ատլանտյան օվկիանոսի մյուս կողմ գտնվող մեր գործընկերը չի վերցնում ոչ ԱՄՆ մեքենաները, ոչ գյուղատնտեսական արտադրանքը, մինչդեռ Միացյալ Նահանգները «վերցնում է ամեն ինչ», դժգոհել է ԱՄՆ ղեկավարը:
Եվրահանձնաժողովը հայտարարել է, որ Եվրամիությունն ափսոսանք է հայտնում Կանադայի, Մեքսիկայի և Չինաստանի նկատմամբ մաքսատուրքեր սահմանելու Վաշինգտոնի որոշման համար, միաժամանակ նախազգուշացրել է նախագահ Թրամփին մաքսատուրքերի վերաբերյալ վերջին որոշումներից հետո հնարավոր առևտրային պատերազմների հետևանքների մասին, ասվում է ԵՀ-ի հայտարարության մեջ։
Եթե ԱՄՆ նախագահ Դոնալդ Թրամփը մաքսատուրքեր սահմանի ԵՄ անդամ երկրների ապրանքների վրա, արձագանքը կոշտ կլինի, գրում է Bloomberg-ը։
ԵՄ խոսնակն ասել է, որ կառույցը «խիստ կարձագանքի» ցանկացած առևտրային գործընկերոջը, որը մաքսատուրքեր է սահմանում անարդար կամ կամայականորեն: «ԱՄՆ-ի հետ մեր առևտրային և ներդրումային հարաբերությունները ամենամեծն են աշխարհում»,- ընդգծել է նա։ ԵՄ-ի տեսանկյունից երկու կողմերն էլ պետք է աշխատեն գոյություն ունեցող հարաբերությունների ամրապնդման ուղղությամբ: Մամուլի խոսնակը նշել է, որ ներկայումս ԵՄ ապրանքների հանդեպ ԱՄՆ լրացուցիչ մաքսատուրքեր չկան։
