Շատ է խոսվում կառուցապատման մեծ ծավալների մասին, անգամ բառ է օգտագործվում՝ «ագրեսիվ» կառուցապատում, բայց նշեմ, որ այս ամբողջ ծավալի կառուցապատման հետ միասին տարեկան ընդամենը ֆոնդի 1-2 տոկոսն ենք կառուցում: Այդ մասին 2024 թվականի աշխատանքներն ամփոփող ասուլիսի ժամանակ ասաց քաղաքաշինության կոմիտեի նախագահ Եղիազար Վարդանյանը:
«Եթե այս թվերի ամբողջ հաջորդականությունը դնենք իրար կողքի, մենք ունենք 19 հազար բնակելի շենք: 60 տոկոսից ավելին կառուցվել է մինչև 1980 թիվը, դրանց մեջ 23 տոկոսը պանելային շենքերն են:
Ի վերջո, կառուցապատումը թարմացում է ենթադրում, և եթե նայենք՝ ամեն տարի ինչքան ենք մենք կառուցում այս մեծ ծավալների մեջ, դա ընդամենը կազմում է 1-2 տոկոս: Ինչքան դեռ պետք է կառուցապատենք, որ գանք, հասնենք լիարժեք թարմացման. սա ակնհայտ է բոլորին, որ կառուցապատման ծրագրերը պետք է շարունակվեն»,- ասաց նա՝ նշելով, որ անհրաժեշտ է մշակել մեխանիզմներ կառուցապատման ծրագրերում իրականացնելու համար, քանի որ ամեն տարի արդեն իսկ կառուցված շենքերը հնանում են:
