Եվրախորհրդարանը հաստատել է Ուրսուլա ֆոն դեր Լայենի ներկայացրած Եվրահանձնաժողովի նոր կազմը, որը սեպտեմբերին հաստատել էր Եվրամիության խորհուրդը։ Եվրախորհրդարանում քվեարկությունը տեղի է ունեցել չորեքշաբթի՝ նոյեմբերի 27-ին, պատգամավորների ձայների 370 կողմ, 282 դեմ հարաբերությամբ։ Նորացված Եվրահանձնաժողովը պաշտոնապես կսկսի աշխատանքը դեկտեմբերին։
Ցուցակում ընդհանուր առմամբ 26 եվրահանձնակատար կա, Էստոնիայի նախկին վարչապետ Կայա Կալասը կդառնա ԵՄ արտաքին գործերի և անվտանգության քաղաքականության հարցերով բարձր ներկայացուցիչ` փոխարինելով Ժոզեպ Բորելին:
DW-ն նշում է, որ Եվրահանձնաժողովի նոր կազմում եղել են վիճահարույց նշանակումներ: Ֆոն դեր Լայենի ամենաքննադատված որոշումներից մեկը իտալացի ծայրահեղ աջ քաղաքական գործիչ Ռաֆայել Ֆիտոյի նշանակումն է՝ Եվրոպական պահպանողականների և ռեֆորմիստների (ECR) խմբից: Նա ընտրվել է Եվրահանձնաժողովի փոխնախագահ և տարածաշրջանային ֆինանսավորման ու բարեփոխումների հանձնակատար, համարվում է առաջին ծայրահեղ աջ քաղաքական գործիչը, որն առանցքային պաշտոն է ստացել ԵՄ գործադիր համակարգում։
Մյուս վիճելի հարցը կլիմայի և մրցակցության հարցերով ԵՄ հանձնակատարի պաշտոնում իսպանուհի Թերեզա Ռիբերայի նշանակումն է։ Նա եղել է Իսպանիայի բնապահպանական փոփոխությունների և ժողովրդագրական խնդիրների նախարարն ու խիստ քննադատության է ենթարկվել Վալենսիայում վերջերս տեղի ունեցած աղետալի ջրհեղեղի ժամանակ:
ԵՀ-ի նոր կազմում Ֆրանսիայի ներկայացուցիչը Ստեֆան Սեժուրնեն է, որը հաստատվել է արդյունաբերական քաղաքականության հանձնակատարի պաշտոնում։ Նախկինում նա եղել է Ֆրանսիայի ԱԳՆ ղեկավար:
Լիտվացի Անդրիուս Կուբիլիուսն էլ դարձել է ԵՄ պաշտպանության հանձնակատար, որն իր պաշտոնավարման առաջին 100 օրվա ընթացքում նախատեսում է Կալասի հետ ներկայացնել անվտանգության և պաշտպանության ռազմավարական փաստաթուղթ և կոչ է անում զգալի ավելացնել ներդրումներն այդ ոլորտում։
