Ուկրաինայի նախագահ Վոլոդիմիր Զելենսկին հայտնել է, որ զեկույցներ է լսել մարտի դաշտում իրավիճակի, հակաօդային պաշտպանության ուժեղացման տարբերակների և ավիառումբերի սեփական արտադրության ծրագրերի մասին։ Որոշում է կայացվել ուժեղացնել ռուսական անօդաչուների դեմ պայքարը:
Նշվում է, որ Ուկրաինայի զինված ուժերի գլխավոր հրամանատար Ալեքսանդր Սիրսկու հետ Զելենսկին քննարկել է ամենալարված ուղղությունների՝ Կուրախովոյի և Պոկրովսկի պաշտպանության ամրապնդման հնարավորությունը։
«Կուրսկի ուղղությամբ մեր զինվորները շարունակում են Ուկրաինայի սահմաններից հետ պահել թշնամու շուրջ 50.000-անոց խումբը»,- տեղեկացրել է Զելենսկին։
Ավելի ուշ՝ Ուկրաինայի նախագահը նաև հայտնել է, որ եվրոպացի գործընկերները մինչև տարեվերջ հրետանային 1 մլն արկ կտրամադրեն Կիևին։
