Այս գիշեր ռուսական ուժերը անօդաչուներով հարվածներ են հասցրել Օդեսայի շրջանին, այդ թվում՝ Օդեսա քաղաքին՝ հայտնել է շրջանի ղեկավար Օլեգ Կիպերը: Քաղաքում աշխատել է հակաօդային պաշտպանության համակարգը, հնչել են պայթյուններ:
Հարվածների հետևանքով վնասվել են մի քանի բազմաբնակարան շենքեր, վարչական շենքեր, պահեստներ և ավտոմեքենաներ: Լրատվամիջոցների տվյալով՝ մարդիկ չեն տուժել: Օդեսա քաղաքի մի հատվածում դադարեցվել է էլեկտրամատակարարումը:
Միևնույն ժամանակ, լրատվամիջոցները գրում են, որ գիշերը Ռուսաստանի Տուլայի մարզի Ալեքսին քաղաքում մի շարք պայթյուններ են որոտացել, շրջանը ենթարկվել է դրոնների հարձակման։
Նշվում է, որ հարված կարող է հասցված լինել տեղի քիմիական կոմբինատին և Ալեքսինի փորձարարական մեխանիկական գործարանին։ Հարվածների մասին պաշտոնական տեղեկություններ դեռևս չկան:
