Օդի աղտոտվածության մոնիտորինգ անող սարքավորումների մասով լավ լուր ունենք: 2024-ին բյուջեով 300 մլն դրամ էր նախատեսվել, մրցույթն իրականացվել է, կա հաղթող: Եթե չեմ սխալվում, արդեն մատակարարումը կա: Այդ մասին 2025 թվականի պետբյուջեի նախնական քննարկման ժամանակ ասաց ՀՀ շրջակա միջավայրի նախարար Հակոբ Սիմիդյանը:
«Երկու սարք ենք գնում, որոնք օդի աղտոտվածության վերաբերյալ օնլայն ռեժիմով տվյալներ կտան: Նաև այդ տվյալները կլինեն այնպիսի բաղադրիչների վերաբերյալ, որոնք մարդու առողջության վրա ամենավատն են ազդում, այսինքն՝ երկու սարք այս տարվա բյուջեով (արդեն գնումն ունենք) Երևանի համար է նախատեսված:
Մեր հաշվարկներով՝ Երևանին պետք է նման 6 սարք, Հայաստանին՝ 15-ը կամ 16-ը: Բայց այս գործընթացը կա, և Երևանի դեպքում այդ երկու սարքերը մեզ բավականին օգուտ կտան»,- ասաց Սիմիդյանը:
«Քաղաքացիական պայմանագիր» խմբակցության պատգամավոր Դավիթ Դանիելյանն առաջարկեց մի սարք էլ տեղադրել Սյունիքի մարզում՝ հաշվի առնելով մարզում հանքարդյունաբերական գործունեության հնարավոր հետևանքները:
