Գազայի հատվածի հյուսիսում՝ Ջաբալիայում, վերջին 48 ժամում ավելի քան 50 երեխա է մահացել, հայտարարել է ՄԱԿ-ի Մանկական հիմնադրամի գործադիր տնօրենը։
ՅՈՒՆԻՍԵՖ-ի ղեկավար Քեթրին Ռասելն ասել է, որ հարվածներ են հասցվել շենքերին, «որոնցում հարյուրավոր մարդիկ են պատսպարվել»:
Ռասելը հարձակումներն անվանել է «Գազայի հատվածում խաղաղ բնակիչների վրա անկանոն հարձակումների սարսափելի հետևանքների ևս մեկ օրինակ»:
Առողջապահության համաշխարհային կազմակերպությունը հայտնել է, որ իսրայելական անօդաչու թռչող սարքը հարվածել է առողջության առաջնային պահպանման կենտրոնին, որտեղ երեխաները պոլիոմիելիտի դեմ պատվաստումներ էին ստանում, ինչի հետևանքով վեց մարդ վիրավորվել է, այդ թվում՝ չորս երեխա: Իսրայելցի զինվորականները հերքել են մեղադրանքները։
Առողջապահության համաշխարհային կազմակերպությունը և ՅՈՒՆԻՍԵՖ-ը, որոնք համատեղ ղեկավարում են Գազայում պոլիոմիելիտի պատվաստման արշավը, մտահոգություն են հայտնել հարձակումների վերաբերյալ:
