Ռուսական զորքերը շաբաթ օրը հարյուրից ավելի հրթիռներ և անօդաչու թռչող սարքեր են արձակել Ուկրաինայի ուղղությամբ։ Այդ մասին Telegram-ի իր ալիքում հայտնել են Ուկրաինայի ռազմաօդային ուժերը։ Զինվորականների խոսքով՝ իրենց հաջողվել է խոցել 98 անօդաչու թռչող սարքերից 42-ը և վեց հրթիռներից չորսը։ Եվս 42 անօդաչու թռչող սարք կորել է տեսադաշտից։
ՌԴ պաշտպանության նախարարության տվյալով էլ՝ մինչև հոկտեմբերի 19-ի առավոտյան ժամը 6-ն ընկած ժամանակահատվածում ռուսական բանակը ոչնչացրել և որսացել է ուկրաինական 16 անօդաչու թռչող սարք։ Երկուսը թռել են Ռոստովի, մեկը՝ Բելգորոդի, ևս տասներեքը՝ Բրյանսկի շրջանների վրայով։
